Al b7th 3n Znooba

المولد

2009-03-12T09:18:00.000-07:00

أخذني كثير من الوقت ...لتصفية ذهني الملبد بالغيوم ( على رأي النشرة الجوية ) ..لكتابة البوست و لا أريد الخوض في الساعات التي قضيتها في الحملقة المتبادلة من و إلى الكيبورد ..وفي شاشة اللاب توب !!..لكن بصرواحة و دونما أي خجل ...فالأمر يتعداني و يفوقني !! فهذه أيام مفترجة ( مثلما يقول أبي ربنا يرجعه بالسلامة ) ...و علامات فاصلة ..و نقط تحول في التاريخ الإنساني و الكفاح البشري الأممي ( ليس بالمفهوم اليساري) ....بصراحة أكثر صعب جداً أن تقيمها فتاة مثلي بريالة ( زي ما بيقولوا ) !!! كما أن تأثير الحدث و إنعكساته تستلزم كتب !! و ده مش لعبقرية مني ..لكن لأن هذا هو الواقع !! ....فذكرى مولد الرسول صلى الله عليه و آله و سلم ..يجب ألا تمر مرور الكرام زي كل الأحداث في حياتنا ...لأن مولد مش دراويش في حلقات ذكر ...و مداحين في التلفزيون ...وحلوى مولد ( و التي لا أريد الخوض فيما قاله بعض من السادة الدعاه ..فهل يا ترى يا هل ترى الحلوى بدعة صانعها و أكلها و اللي بيمر عليها حته في النار) !! و عروس المولد و الحصان ( اللي كانوا بيتصنعوا من السكر قبل ما نستوردهم من الصين زي كل حاجة تانية ) !! ..المولد مش الزفة ...و مش الطراطير ( اللي إحنا كلنا لابسنها طول أيام السنة ) ...و مش زمامير ( اللي بيدللوا بيها علينا ولا كأننا في النخاسة ) ....كل ده مش مولد سيدي النبي –صلى الله عليه و آله وسلم-...دي مظاهر إحتفالية ممتعة ..لكن مش هي دي روح المولد ..ففي صغري كانوا يرددوا على مسامعي ..." و ما ينطق عن الهوى إن هو إلا وحيٍ يوحى " ...يا صلاة النبي يا صلاة الزين ..و صراحة اللي فهمته مؤخراً ...أن مش المقصود بده بس مسألة الوحي ...لكن المقصود كمان أن الرسول صلى الله عليه و آله وسلم لم يكن ينطق كلمة عن هوى ...أو رغبة ....أو مطمع ...و بصراحة الناس من قديم العصر و الزمان و بذات في هذا العصر كلهم رغبات ..و شيطانية في أغلب الأحيان!!!...بسبب الشهوات اللي بقت على البحري ( و شوفوا الإنترنت و البلاوي اللي فيه ...من الsatanism للدعارة المنمقة اللي حطنلها جلاتور ) ...و لسان حال الناس كلها بيقول ..جاينلك يا رب بس بعد ما نهيص أوي !!!...ده لو عرفوا يعني إيه رب أصلاً !!..يعني كام واحد في العالم ده قتل عشان رغبات أو أهواء أطماع..لأ وإيه على أضواء الشموعة و السفر العامرة بما لذ و طاب ..و الموسيقى الشاعرية ..و الرقصات الرومانسية و لا مانع من بعض القبلات على الطاير ....يا عالم إحنا بنتكلم على مئات الملايين ربنا وحده عالم بعددهم !!..فياريت نحاول تحييد شهاوتنا دي ..قبل ما تكلنا لحم و ترمينا هياكل - كانت ذات يوم آدمية -!! لأننا لو ننزعنا زيف الحضارة و التمدن ...سنجد بداخلنا إنسان كامل الإنسانية ( و محدش يفهمني غلط أنا مش بقول ننعزل في الجبال ..بس بقول لنفسي أولاً نبطل حنجلة شوية و نطفي التلفزيونات و الراديوهات و الكمبيوترات ...ساعة صفا يعني مع نفسينا ) ..دي نقطة ..النقطة التانية ...أنا طول عمري بكره التكشير و التجهم و الكآبة ..و المكشرية و المتجهمين و المكتئبين ...ليه بقى ؟!! لأنهم بيفكروني بميولي الإكتائبية ( متخفوش مش إنتحارية الحمد للهJ ) ..و ده موضوع يطول شرحه ..بس بصراحة و أوعى حد يقفش ...مبكرهش في حياتي قد الملتحين و المخمرات المكشرين ..و ده مش موقف عقائدي من الحجاب ..لأني محجبة و فخورة بده ...و أنا مش راجل بصراحة و الحمد لله ماليش دقن من الأساس ...لكن يعني لما بشوف ..حد يعني ملتحي و متجهم و مكشر و متنشين كده ..بكتئب زيادة بأمانة ربنا !! و معرفش ليه!! معرفش يمكن عشان الملتحي ده بيبقى بيقول أنه ملتحي عشان ده سنة عن الرسول عليه أفضل الصلاة و السلام ...طب ماشي و بالنسبة للتجهم ده كله ...و كأن الضحك و حتى الإبتسام حراااام حرااااام حراااااااام !!! طب يا أخي ..أنا كمان و أنا طفلة كنت فاكرة أن المتدين لازم يبقى مكشر ( هيــــــــبــــة بقى يا خونة ) ....و معرفش جبت الكلام ده منين ..يعني بتقرأ في سيرة سيدنا النبي عليه الصلاة و السلام ..مواقف ..و تصرفات تفرح القلب المكلوم ...يعني الرسول مرة كان قاعد مع سيدنا علي - ع – و بياكلوا بلح ...هما الإتنين ( شوفوا البسااااطة .. مش زي عندنا اللي يطلع الكوبري يطخوووه ..سؤال يطرح نفسه ما يشفلهم بلد تانية يعملوا فيها القصور طالما خايفين من شعوبهم )...و الرسول آخذ ياكل البلح و يحط النواة قدام سيدنا علي ..و ضحك معاه و قالوا : أكلت البلح كله ..فرد الإمام علي : إذن أكلت النواة يا رسول الله ..و بصراحة أنا لم عرفت الموقف ده أستلقيت على ظهري و قعدت أضحك ..ألا ما الهزار بقى مطلعش حرام يعني !!....و طبعاً أنتوا عارفين البني آدمين و خاصة من أصحاب الحسب و النسب و الفلوس و النفوذ ..لوحد داسلهم على طرف ( و حتى لو مادسش ) ..القفش و يبقى نهار حضرتك أسود !! و نهار والد و والدة حضرتك أسود زي الخروب ( اللي عمري ما دقته الحمدلله) ..و يبقى يوم مغيم مطلعتلوش شمس !! و هنا بقى لازم نذكر شخصية نعمان ...مين نعمان ده راجل من المدينة أيام الرسول صلى الله عليه و آله و سلم ..و بمقاييس العصر ده ( و كل عصر و حياتكوا ) لاسع ...و ليه نوادر تفطس من الضحك !! خدوا دي مثلاً ...مرة واحد بدوي ..ساب غنم ليه ..فقام نعمان ده خدها و طبخها و أكل الغلامة ( و أنا لن أخوض في الـأحكام الفقهية التي لا علم لي فيها ) ...فالبدوي لما رجع سأل الناس فقلولوا نعمان أكلها للغلابة !! فراح يشتكي للرسول صلى الله عليه وسلم...فالرسول قعد يدور على نعمان ..الي بدوره لما عرف أن رسول بيدور عليه راح أستخبى في مكان ما ...و لما الرسول وصل المكان ده سأل ناس عن نعمان ...فجاوبوه : لا نعرف يا رسول الله ..و هما كانوا من تحت لتحت بيشاوروا للرسول على مكان نعمان اللي كان مستخبي وراهم بين النخل!!..و أول ما الرسول قرب من مكان نعمان..نعمان هز جزع النخلة ..فوقع القذرات ..و التراب على الرسول الكريم ...تخيلوا يا جماعة لو أنت أتعمل فيك كده ..يعني لو مثلاً واحدة رمت عليك حلة مولخية و لا مية مسح من البلكونة ...حتعمل إيه ؟!! ممكن تشرتشحلها ( و أنا غالباً حعمل كده ) .. و ممكن تشتمها ( ربنا يحفظ ألسنتنا جميعاً ) و ممكن تمد إيديك عليها !! لكن الرسول عمل إيه ؟!! الرسول بمنتهى البساطة...سأله ليه عمل كده ..قام نعمان شاورله على الناس اللي خبصوا على مكانه و قاله أنهم هما اللي حرضوه على ده !!!.. إحنا دلوقتي شفنا اللي بيضرب مجرم حرب بالصرماية ( على رأي إخونا الشوام) بيحصلوا إيه ؟!!و نفس الراجل ده مره في السوق راجل أعمى طلب منه يدله على مكان يقضي فيه حاجته !! قام نعمان خده و حطه في ساحة عامة ..و طبعاً الناس قعدت تضحك !! و لما سأل الضرير ..قالولوا نعمان ..فأستحلفله ..و بعديها بشهر كان الضرير في المسجد و أقترب منه نعمان و قاله : أتبحث عن نعمان ..فأجابه : نعم ...فقاله ..حخدك ليه ...و خلاه فعلاً يتحسسه !!! مين بقى تصوروا كده ...سيدنا عثمان اللي كان وقتها خليفة و عينكوا ما تشوف إلا النور ..قاعد الراجل الضرير يضرب في سيدنا عثمان و هو بيصلي ..و إشي ضرب على راسه و لكميات و رصيات و بوكسات!! و هو بيصلي ...فلما فرغ سيدنا عثمان من الصلاة ..قاله : ماذا يحدث ؟!! فأجاب الضرير : ألست نعمان ..فرد سيدنا عثمان : أنا أمير المؤمنين ( تخيلوا ااااا الخضة هههههه ) ...فانتفض الضرير مزعوراً : من فعل بي هذا ؟!! فقال له سيدنا عثمان : نعمان !! و لم يعاقب أمير المؤمنين عثمان نعمان !! لأنه فهم الفكر النبوي ..و أن ده طبيعة الرجل ..( زي عندنا بظبط بيحترموا طبيعتك ....هااا حد يقدر يقول غير كده ...و النبي ما تقولوا غير كده ده أنا ورايا كوم لحم J) ..دي الروح اللي رسول أرساها ...روح جميلة أوي تستوعب الناس بإختلافتهم و خلافاتهم !! مش الفكر اللي عاوزنا نبقى كوبي باست من بعض !!!....ده غير لطف سيدنا النبي ...لطف لطف لطف و مش قادرة أوصفه بجد يعني كان يفتح إيده عليه الصلاة و السلام ..للأطفال ..و يقولهم : من أسبققكم إلي ؟!!...و يجري عليه الأطفال كلهم و يحضنهم ...الرسول إللي قابل مرة طفل بيبكي في طريق من طرقات المدينة فسأله فرد الطفل أن أبوه توفى و أصبح يتيم ..فالرسول أحتضنه و قعد يلعب معاه و يأكله ...و قاله :ألا يكفيك محمداً أباً ؟!!...يا إخونة إحنا بنشوف أطفال قد إيه في العالم مش لاقين القوت ..و عادي ...بنعدي عليهم و حتى الدعاء مش بندعيه ..الرسول اللي أنصف اليهودي على مسلم !! ( بزمة ربنا لو حكموك دلوقتي بين يهودي و مسلم حتعمل إيه ؟!!)...الرسول اللي دخل مرة على فتى يهودي بيموت فدعاه للإسلام ..فأسلم الفتى فخرج الرسول من عنده بيبكي و بيبتسم!! ..بيبكي لموت الفتى ..و بيبتسم لأنه أعتق نفس من النار !! ( بزمة ربنا و أنا راضية بزمتكوا مش لو أنت كنت حتقول ما يتحرق ده يهودي ..مش شايفنهم بيعملوا إيه في الفلسطينية ؟!!) ...الرسول اللي علمنا أن الناس كأسنان المشط ..و أنه لا فرق لعربي على أعجمي ..و أنه الناس كانت أمة واحدة ..." يا أيها الناس إن خلقناكم من ذكر و أنثى وجعلناكم شعوباً و قبائل لتعارفوا..."....شوفوا بقى ..إحنا أخلاقنا بقت إزاي؟!! الناس بقت بتفرق بين الناس إزاي ..يعني المسلمين ايام ما كانوا مسلمين بجد هما الوحيدين اللي خلوا العبيد يحكموهم ..و السود يحكموا البيض .. و الأكراد و الترك يحكموا العرب ( زي نور الدين و عماد الدين زنكي اللي كانوا أتراك ...و صلاح الدين تلميذ نور الدين اللي كان كردي )لأن مكنش عندهم التفكير العرقي الطبقي البغيض ..ده اللي كابس على أنفاسنا ...و حاشرنا في الخرم الضيق أوي ده !!..و الحمد لله فالعبدة لله تعاملت مع ناس كتير و من أصول و عقائد مختلفة ...و الغريب بقى أنك تلاقي ...الناس بتحرم على غيرها اللي بتحللوا لنفسها ..فالفارسي بيقول على عربي متآمر ..و العربي بيقول أنه صفوي ساساني توسعي...الأكراد يقولوا على العرب قتلة ..و نازية ..و العرب يقولوا على الأكراد خونة و عملاء !! ..الأتراك ..عنصريين و عندهم النزعة الأتاتوركية و مناخيرهم في السما..و الأمازيغ ..بيقولوا على العرب غزاة ..و العرب بيقولوا عليهم طابور خامس ...و هلم مجرا بقى ....يا بقررررررررررر أنتوا مش شايفين أن كلكم ..عنصريين ....كلكم زي بعض و فيكوا اللي بتنتقضوا عليه الآخرين ..كلكم بتعمموا الأخطاء ..و الرسول علمنا أنه لا تزر وازرة وزر أخرى ..يعني كل واحد يتحاسب على أخطائه هو و تصرفاته هو ..مش أخطاء ...الوالي والزعيم و السلطان !! و ألا كده حندخل سكان كوكب الأرض كلهم السجون و المعتقلات تحت الأرض ..و حنورثها للحيوانات بالمنظر ده ...و نسيبهم يقسموها !! ( عذراً رسول الله فلازال بيني و بين الأخلاق النبوية الشريفة ما لايقل على مليون سنة ضوئية ...دعواتكوا بقى يا أخونة ) ...ما علينا ما هو العنصرية دي كوم ...و التفرقة بين أبناء الأسرة الواحدة كوم تاني خلاص ..يعني الرسول علمنا أننا نعدل !! بين ولادنا في كل شيء !! كل شيء ...و الإسلام اللي كرم المرأة بنت ..لما وعد اللي يخلف بنت و يدخل على قلبها السرور ..و يحسن تربيتها يدخل بيها الجنة ...و الإسلام اللي كرمها مرأة لما جعل الجنة تحت أقدام الأمهات !! و الرسول صلى الله عليه و آله وسلم اللي على فراش الموت قعد يردد : الصلاة الصلاة و ما ملكت أيمانكم ..( يا حبيبي يا رسول الله كأنك شفت على فراشك اللي حصل و اللي بيحصل و اللي حيحصل ) ..كل الحاجات المشرفة دي ...و شوفوا بقى اللي بيحصل للمرأة بأسم الإسلام ...لأ و إيه يجبيولك آيات من القرآن اسم الله يعني !! يا جماعة زوجات الرسول كانوا بيعملوا في حاجات ...يعني الله يكون في عونه ..و لو أي راجل دلوقتي مراته عملت فيه كده حيطلقها بالتلاتة !! إن مضربهاش بالجزمة و الصرماية و الشووز و الشبشب و القبقاب و أي حاجة تانية تحمل قذر الشارع.. لكن صبر الرسول و أخلاق الرسول و دراسة القرآن هي اللي هتفهمنا أحكام القرآن !! و مش الهلامية و الأدمغة الخاوية و الفهم الساذج اللي إحنا بقينا فيه !! الرسول اللي قعد يعيط على قبر أمه السيدة آمنة ( اللي مكنتش مسلمة على فكرة ) و لحد ما أبكى كل من حوله ... الرسول اللي دفن كل ولاده و متبقاش ليه غير السيدة فاطمة الزهراء عليها السلام ( ده اللي بيمتلوا ابن بيقول مين شايل همي و حاسس بالنار اللي في قلبي فما بالك بكل الأبناء ) و يقوم الليل لحد رجليه تتورم ...الرسول اللي علمنا أنه من أرفع مقامات الشهادة و الجهاد هي كلمة حق عند سلطان جائر !! و لما أفتح عيني و ألاقي نفسي و كل من حولي صمُ بكمٌ !! و هوووووس و لا كأن في ظلم في الدنيا دي .....يا أخونة الموضوع فيه مشاعر و عواطف و روحانيات و قوة... الموضوع كبير أوي أوي ..لأ و بيغظني أوي الصورة اللي في الغرب اللي بتصور السيدة عائشة و هي لابسة طرحة و ماسكة عروسة و بيشدوها عشان تتجوز !! يعني محسسني أن الرسول كان في القرن ال21 و ساكن في إحدى أبراج نيويورك !! و عائشة دي كانت في كي جي تو و شدوها من شعرها عشان تتجوز !! يا إخونة مش كده أنا جدتي أتجوزت 15 سنة لجدي اللي كان عنده 16 سنة و ده مش من زمان أوي !! يعني مين أغتصب مين ؟؟!! محدش دي كانت حياتهم ..بعدين ده أنا عندي 19 سنة تقريباً و لسه باكل مصاصات !!! يعني إحنا اللي عندنا حالة طفولة متأخرة ...و هم كان عندهم حالة نضج مبكرة ...يعني صحراويين من ألف و ربعمية سنة ..عاوزينهم يبقوا إزاي !!! ..لأو تلاقيهم عمالين يولولوا على ستنا عيشة ..و يا عيني على عيشة و اللي جرى لعيشة اللي جرالك مجراش لحد يا أختي!!! ( والمناديل السودة و اللي لازي منه )أنتوا عارفين لو كانت عيشة عندها خمسين سنة !! كانوا برده حيولولوا ...و يقولوا ده مش تحضر و دي لا إنسانية ...يعني في الخمسين المفصلات بتتعب !! و هشاشة العظام بقى ...و مشارف سن اليأس !! ... أنتوا عارفين سن اليأس و الإكتئاب ..و الصحة النفسية !! و النبي ما ناقصين هرشة نافوخ !!! ...و يا جماعة العبدة لله وصلت لقناعة ..يا ريت ما حملش ديني أخطائي ..يعني زينب ليها رغباتها ..و شهواتها ..صح أو غلط موجودة ...فياريت لو لهثت وراها ...أبقى عارفة و موضحة ...أن ديه زينب ...برغابتها ...مش زينب و أبوها و أمها و إخواتها و قريبها و سلفلين جدودها ...و العرب و المسلمين و الرسول ...و الدين ...دي زينب ...و بس هي اللي تتحمل خطأها .. مش الآخرين و مش الرسول !!....نفسي أقوله أني بحبه لأنه هو اللي علمني الحب .....نفسي أقوله شكراً ....لأنك علمتني جمال أن أكون إنسانا......يا رسول الله الدنيا أتغيرت في عنيه بيـــــــــــك ....يا حبيــــــــبــــــي يا إمـــــامي يا رســـــــــــولي يا محمــــــــد ... يا منكـــــــوبي العالم النور آتٍ من غار حــــراء.

أموت....و أبتسم

2009-02-23T05:46:00.000-08:00

كان يا ما كان يا سعد يا إكرام و ما يحلى الكلام إلا بذكر النبي - صلى الله عليه و آله و سلم – ( و لو حد يعرف مين سعد و مين إكرام يا ريت يشجيناJ) ..كان في ولد صغير ...قصير ....رفيع...لكن له قلب أبيض كبير ....بسحنته البرونزية ( و هي كلمة أستعرها مؤقتاٌ من جدتي) ...و شعره الناعم ..الذي يتداخل فيه الأشقر مع البني!!! و الملحوظ أنه صاحبنا ده كان هو أول من طلع صرعة السابيكي...و ده من تسعينات القرن الماضي!!! و ده بصورة طبيعية ربانية ..و بدون أدنى تدخل من الجل ...أو السشوار!!...صاحبنا والذي نظراً أن الستر نعمة ..حنحجب أسمه و حسميه محمدين ..محمدين ده كان طفل زغنطوط ...و رياضي ....مهذب ..مؤدب ...و خجول....و ده المستغرب في زمنا ده !! خاصة أن الولاد في هذا الزمان – و في كل زمان وحياتك- ناس تخاف متختشيش!!! يعني ترفعلهم شعار الشبشبة هي الحل!!..لكن صاحبنا كان عكس شباب اليومين دول ...و كان منذ نعومة أظافره ..خجول ..دمث الأخلاق ..يستحي أنه يتصل بزميلته ..كي تمليه عليه الواجبات ..كان ينوب بأخته عنه!! على عكس كل أقرانه ..في هذه السن!!!!!!...و زي ما أدخل صرعة السبايكي قبل ما تعرفها أوربا!! فقد أدخل صرعة الأهازيج الساخرة التي لم تترك أحداً في حاله !! لا القاعد ولا الماشي و لا الراكب و لا الواقف !! كله !! و كان يرددها ورائه الجميع بغبغائياً!!!...كانت لديه تلك المقدرة الغريبة على تأليفها و تلحينها ..لكن الملفت للنظر أنه لم يشترك أبداً في جرم إلقائها ..أو صب ألهبتها على الضحايا!!!...... و لازالت نكات محمدين و قهقهاته العالية تحضرني ...و إن طمست المحتويات في سراديب ذاكرتي الهلامية!!!.و تنوعت الفئات التي أستهدفتها أهازيج محمدين النارية ....فمن الكلابيز أصحاب الكروش الكبيرة ، اللي بينهجوا في الطالعة و النازلة!!! و كانت السخرية تتنوع من بالو ..إلى بالونة ...و دبدوب...و الطخين أهو .أهووو...( والحمد لله العبدة لله لم تكن في هذه الفئة أنذاك)و كان هناك ..الطلبة الذين يزدرون الطعام إزدراداً..(يعني بيبلعه ) ...و اللي كانوا بيكثروا من مضغ الأكل ..( و لست واثقة أن أسمي لم يندرج على اللائحة) و في الطلبة الدحاحين... اللي محدش بيحبهم خالص !!من العيال اللي بيبقوا قاعدين في الديسك الأولاني و لابسين ندرات قعر كباية!! و مركزين لدرجة فتح بقهم ببلاهة !!! و بيكتبوا كل فسسسوة بيقولها المدرس!!!!ده غير قرقعتهم بأصابعهم أول ما يُطرح سؤال...و تباريهم في أيهم سنال شرف ..الإنتهاء أولاً من الإجابة !! و هو الأمر الذي يستفز الطلاب عموماً و اللي ملهمش في العلام خصوصاَ( و العبدة لله كانت تقع ضمن هذه الفئة)!! و كمان أصحاب الرائحة النتنة ...و المقملين والمقملات!!! و على رأسهم المسكينة حبيبة و التي تحجب ثلاثة أرباع بنات الفصل أنذاك..خوفاً من طيران قملها!! و استقراره على رؤوسهم !!!...و نشروا عنها شائعات بغيضة ...و أتهموها ..و أسائوا إلى سمعتها كثيراً و نسجوا الأساطير حول ما يطير من رأسها (و لا كأنه مستنقع أو مقلب قمامة!!). الحمد لله لأنني كنت أقع في قائمة الدحاحين ....فقد كنا ننل أقل قدر من السخرية !! و أهونها لذاعة!!....و يبدو أن حبيبة المسكينة ..لم تسلم من صاحبنا!! فتخلص من القمل تدخل على الصن سيلك ..فقد كان يصفها بأنها أحسن دعاية لشامبو الصن سيلك ...و بسزاجة طفولية .. أولا تعني صن شمس؟!! أي شعرها المشعث من عند الجبين ..و مقنفد!!...أما السيلك...فهو الليف السيلك ...و هي تمثل حالة شعر حبيبة ..المشعث ..المقنفد!! ....و كنت بخاف جداً من موضوع الصن سيلك ده ..يعني مش ناقصين فضايح ..و لأن شعري الحمد لله مش سلك ..لكنه كان قابل أنه يبقى صن!!...... ...لكن عقدة الصن لازمتني فترة طويلة في طفولتي ..فكنت أبل شعري قبل نزولي للمدرسة ...و أثناء الدوام المدرسي حتى لا يكون سلك ...و هو ما كانت تنهرني أمي عليه ...قائلة : أن شعري كويس و مش في حالة الصن ..و أقنعتني أنها تهيئات !!و أكيد حسبنت على محمدين!! ...
كما أنه أول من أدخل الكور المطاطية الصغيرة ...و التي كانت أملة بالنسبة لها...و كان يجري الحوش كله وراها!! و من ضمن نوادره أنه كان ينادي بأعلى صوته ..على أي من الزملاء ...فحين ...يرد المُنادى ...يقول له ...ما كنا يردده الجميع ورائه وقد فتحوا فيهم بإنشكاح ....
حقول للميس عليك ....
أن أنت بتاكل كيك و بتلعب بالبوفتيك
و لا أدري حتى الآن سبباً الساعدة العارمة التي كانت تملأ المكان...و لا أجد تفسيراً لهذه الكلمات التي كانت تُردد و كأنها نشيد وطني!!!
فما علاقة الكيك بالبوفتيك ؟!! و هل يا ترى يصلحا للأكل معاً؟!! أم سيتسببا بكبسة معوية عويصة..قد تتطلب غسيل معدة عاجل !!!!ا
و يبدو لي أننا كنا من ولالد الزوات ...الذين لم يتمرمغوا في تراب الميري!!!...فبنقول ميس ...و بوفتيك ..في حين كان الفول و الطعمية أملة أياميها ( و لا يزالو)
و يحضرني أيضاً:
عاااوزيين دم
عااااوزييين الناس تتلم
عاااوزين موت
عاااااوزين الناس تموت
و دي كانت صرعة في عالم الغناء بالنسبة لنا !!! و هو ما كان يناقض طبيعة محمدين المتسامحة!! التي تبعد عن الشر و تغنيله!!!...فهو لم يكن من هواة الخناقات و المشاكل!!....كم كانت تعلو الضحكات !! و كم كنا سعداء !! بهذه الصرعات العجاب ( بالنسبة لنا في هذا الوقت) !!...ممكن تستغربوا!! و أنتوا تعرفي كل التفاصيل دي منين و إزاي؟!! ..أعرفها لأن محمدين كان من أقرب أصدقائي أيام الطفولة البريئة !!..و إن كنت لم ألتق به منذ ما يقرب من الثلاث سنوات . قد تسألوني ...و أنت إيه اللي فكرك بيه بعد كل هذه السنوات؟!!...هذا لأنني منذ ما يقرب من الشهرين ...وصلني إتصال من أمي تنعي إلي فيه محمدين!!!! الذي مات في حادث سيارة و هو لم يتم عامه التاسع عشر بعد!!!..يومها بكيت بكائاً مريراً ..و أخذت أقلب في ألبومات الصور ..و أبكي ...و أنظر في الصور التي وضعوها على جروب لأصدقائه في الفيس بوك ( و هي جروبات لمن توفوا...و أصبحت منتشرة و المؤلم أنهم كلهم في أعمار الزهور)...قد يتعجب البعض ..كيف تدحثي عنه بهذه السخرية !!! أنا لم أكتب عن هذه الواقعة سطراً !! إلا الآن !! لأنني لا أريد أن أتذكر ...له سوى هذه الذكريات التي تسليني ..حين يستبد بي الملل!!..كما أنني أريد أن أنسى ما حدث بعدها..أريد محوه بالأستيكة!!! كأنه لم يحدث ..و كأنني لم أره ..أو أسمع عنه!!!..لا أريد أن أتذكر صديق الطفولة سوى كل ما هو جميل!!! أريد أن أتذكره بالبسمة التي كان يرسمها على الشفاة ..و ليس بالدموع أو الضعينة.لا أريد أن أتذكر أننا كنا وجها لوجه و لم نكن نتصافح ..و أنا عن نفسي كنت أتبع القاعدة التي تحفظها كل بنت عن ظهر قلب و هي :

اللي عاوزني يجيني ...أنا ما برحش لحد!!!

أووووف أنا قلت إيه ...عاوزة أتذكر له كل خير....الله يرحمك يا أخي ....و في حفظ إلى و إلى رحمة من الله و مغفرة بإذنه ...و سأدعو لك في كل صلاة ما درجت على الدعاء به لنفسي ( دون أن أعرف عمن أخذتها) ..يا رب أسترني حياُ و ميتاُ ..و أسترني دنيا و آخرة.....أقرولوا الفانحة يا جماعة.....

موبايلي وقع في المية ....هابي زالنتين داي!!!

2009-02-15T11:06:00.000-08:00

يا عيني عليه و على بختي ....مكتوب علي قضاء ..أهم عيد في السنة بين واحد من خيارين ...أحلاهما مٌر شديدة المرارة ..الخيار الأول: أن أقضيه وحيدة ...شاردة في غرفتي و بين تلال كتبي الجامعية ، التي لم أقرأ صفحة واحدة من أي منها!! و الخيار الثاني : أن أقضيه مع أخي ( الذي يحلو لي تسميته ...حماقه مع كامل علمي أنني أخالف القاعدة الجليلة خير الأسماء ما حُمِد و ما عُبد) و نظراً للظروف العوائلية (الشبه دائمة يعني ) و مع وجود والدي خارج أرض الوطن ( ربنا يرجع كل مسافر بالسلامة ) ...فتقلصت خيارتي ....لكنني قررت أن أتمرد !! و أن أستمتع بالزالنتين ( وهو الأسم الذي يطلقه الأصدقاء ) ...حتى لو لوحدي ..و أن أتمثل بمقولة الست إليسا الشهيرة (لوحدي طب و ماله!!)...أستيقظت من النوم و كلي عزم أن أجعل هذا الزالنتين ..أفضل زلنتين لي في حياتي ( التي لم أحتفل أبداً فيها بالزالنتين ..لأنني على ما يبدو رجعية ) ... و لا أدري لما قفز إلى ذهني مشاهد مظاهرات الإحتجاج التي ملأت الهند إحتجاجاً على فقدان الناس لهويتهم ..و غربنة المجتمع الهندي !! و لهث الشباب وراء البدع ...و منها الزالنتين!! و قلت لنفسي زينا بالظبط مليين الشوارع إحتجاجات على الغلاء و الكواء ..و أرتفاع الأسعار السريع (اللي ولا سرعة الضوء) و عجبيييييييي...رن موبايلي الحيلة معلناً وصول رسالة...فقفزت فرِحة : هاااا لعله أول تهنئة لي بالزانتين!! ..فإذا به إعلان عن أحد المسابقات!! ..:@ آه من أبو إتصل لتفوز بالجائزة الكبرى ...و الحقيقة الكبرى أنه لا جائزة و لا إحزنو!!..هكذا كانت أفكاري دائماً متبعثرة!! أدخل في موضوع و أخرج في موضوع ...و محدش بيفهم حاجة!!. قررت زيارة إحدى قريباتي ...و ده لضمان عدم توقف المعونات الغذائية عننا !! و نظراً لكون العبدة لله طباخة ماهرة !! فإن الأقارب لم يبخلوا بمدنا بالمؤن الغذائية ، المطبوخة طبعاً ..( و كله بحسابه أكيد) و لذا فقد أصبحت ، -و على غير عادة مني – من أشد الناس حرصاً على صلة الرحم !! و الروابط العوائلية الموغلة في القدم!! و أهو اللي متحتجش لوشه بكره تحتاج لقفاه!! ..فأنتعلت حذائي ذي الكعب العالي !! و وضعت مكياج ..و تأكدت من أنني لا أبدو مثل موظفات القطاع العام ( كما يحلو لأمي أحياناً أن تصفني )..و لكنني و بكل صدق ، كنت في شغل عن كل هذه الإستعدادات ..نظراً لخوفي من (إنكفائي على وجهي ) في حال نزولي إلى الشارع ..لأن النقر و الحفر في الشوارع من جانب ..و المجاري الطافحة ..من جانب آخر ..فيأما أقع في النقر...يا أما أبتل!!.ربنا سترها و لم أنكفأ على وجهي في الطريق ..لكنني أحسست بكاحلي يشاور عقله أكثر من مرة بأن يلتوي ، و لكنه فيه الخير مفرجش الشارع عليه!! .أنهيت الزيارة العوائلية سريعاً ..و تأكدت أن المعونة الغذائية ( من المحمر و المشمر طبعاً) ستصل في الموعد المحدد. عدت إلى البيت سريعاً ...لأبدل حذائي ذي الكعب و أرتدي بدلاً منه جزمة كوتش ( على رأي جدتي ) ..! و نظراً لصربعتي دخلت لألقي نظرة اخيرة على شكلي ..في مرآة الحمام ..فوضعت الموبايل فوق جردل مغطى !! و نظرت متفحصة في المرآة و حين هممت بالخروج ..خبطت رجلي الغردل ..و أُزيح الغطاء!! و سقط ..موبايلي الحيلة في الماء!! و شيعته بنظرات ملؤها الخسرة ..لكن أبدن لن أضيع زالنتينتي الأول في التحسر على موبايلي الحيلة !! خاد الشر و راح!!..و هممت في نشاط ..كي أحتفل بالزالنتين ..و لأنني ممن تربوا في الخليج ..فالميكروباصات و المترو ..أملة بالنسبة لي!!..يعني أسعد لحظات حياتي تكون حين أركب الميكروباص و أفتح فاهي في دهشة و هو يسير بسرعة على كورنيش النيل ( و صراحة نفسي أجرب التوكتوك كمان) ، لكن دي أملة و أهي أحسن من الحمير و لجمال!! و مع كامل إحترامي للشعب المصري من أسوان للسلوم ..الذي يعاني من وسائل النقل العامة ..و خاصة الأخوات الحوامل اللي بيخدوا كل رزع و هبد الميكروبصات و السادة اللي بيقفل عليهم المترو و يمشي!! . و صلت إلى منطقة التحرير ، و طلبت من سائق الميكروباص أن يُنزلني ، عند الملف!! ( و دي معروفة لرواد الميكروباصات طبعاً). طأت قدمي الشارع لأرى المكان كله مكسو بالحَمار ( بالفتحة مش حُمار بالضمة) ..زهور حمراء ، دباديب حمراء و حتى كراريس حمراء..كل المشاة ماسكين أي شيء أحمر ، و حتى لا أبدو دخيلة على المحتفلين و المحتفلات بالزالنتين ..قررت أن أقصد كشك الزهور ..على الجانب الآخر في الطريق ..لأشتري و لأول المرة في حياتي باقة زهور حمراء !! محدش أحسن من حد يعني ..و متنسوش (لوحدي طب و ماله ) ..و مشيت في الشوارع التي أكاد لا أعرفها ..( و هنا إحدى هفوات جنوني ، و هي أنني أفضل السير في الطرق التي لا أعرفها) ..و كلي زهو بباقة الزهور التي أشتريتها لنفسي!!..أخذت أمشي في الشوارع لا أدري كم من الوقت ..لكنني قررت أن أتأمل المباني المحيطة ، التي طالما ما أعجبني معمارها ..دون أن تُتاح لي فرصة مشاهدتها ، عن كثب !! و كنت أرى من طرفي عيني ..السائرين و السائرات ..حاملين ما لذ و طاب من هدايا الزالنتين ..من شيكولاته و دباديب و قلوب ..و توقفت عند إحدى البائعة الجائلين ( لأنني من بتوع الرخيص مفيش أحسن منه)..و أخذت أجول بنظري بين بضائعه حتى أستقر رأيي على شراء قلوب حمراء مثبته على عود خشبي ..لكل واحدة من صديقاتي اللاتي سألتقيهن غداً...و كان لي هدف خفي من وراء شراء هذه الهدية بالزات ..و هي أن لها إستخدان مزدوج ..بمعنى أن بإمكانك أن تعطها لمن تحب ..أو تفقأ بها عين من لا تحب (مستخدماً حد العود ) ..و أرجو التنبيه أني جاية أهدي النفوس و لا أسعى لنشر الجريمة!!. ..أنتهى زالنتيني لأنني شعرت بالإيعاء و سمعت زقزقة معدتي !! و لأنني لا أحب أن أغضب معدتي أبداً, قررت أن أكن أول مستقبلي المعونة الغذائية (من المحمر و المشمر ) في حين وصولها !!

و قررت أن أعود بالمترو ..لأنتقل من الشوارع الواسعة ، و العلامات المرورية الأرضية و إشارات المرور ..و لأؤخذ أخذاً من بين إخواني الزالنتيين ..لأجد نفسي في طرقات حي المتهالكة ..الذي كان يوماً جزئاً من القاهرة الكبرى ..قبل أن تتحول إلى القاهرة الصغرى!!.

هابي زالنين داااااي

لكي الله يا غزة

2008-12-29T08:35:00.000-08:00

سيتعجب الكثيرون من التغير المفاجىء الذي طرأ على أسلوبي من التندر على كل شيء و أي شيء ، لا أدري كيف ستأتي كلماتي ...لكنني واثقة أنها لن تكون مرتبة بل ربما ستكون غير مفهومة.....لأن الحروف التي أكتبها الآن .....أكتبها بالدم ....دماء إخواني المحاصرين ، المقصوفين ...الجوعى ، العطشى الثكلى في قطاع غزة ....دماء الشقيقات الخمس .....و دماء 330 هم تعداد الذين سقطوا في هذا العدوان ، و العدد في تصاعد من لحظة إلى أخرى ....لا أملك كلمات تعبر عما يختلجني الآن ؛ هو إحساس بالمهانة ، الضعف ، و قلة الحيلة ، بل الدونية الشديدة... إحساس بأني أرى أمي ، أبي و أخوتي برؤوس أحناها الموت أو أثقلتها النكبات ...هي دموعُ منهمرة و إن كانت لا تفيد ....إخواني في قطاع غزة : لا تطلبوا الغوث من الحكام العرب ، لأنهم أبداً ما أغاثكوا و أبدا لن يغيثكوا ..هم قتلة لشعوبهم ، مصاصي دماء رعيتهم ...فكيف يكونوا رحماء بكم ....إخواني أهل القطاع ...صمودكم يخجلنا ، لأننا في صمت القبور إزاء أحوالنا ....موتكم يقتلنا لأننا شاركنا جلاديكم بسكوتنا ...إخواني أهل القطاع أنتم أشرف من أن تحتاجوا إلينا و نحن أحقر من أن أساعدكم ، لأننا كالنعام نخبىء رؤسانا ، و نضع بيننا و بين حقيقتنا حُجبٌ واهية ٌ...هم باعوا أرضهم ، هم يكرهوننا ، هم تهديد علينا ...و غيرها من تلك المزاعم الهابطة الكاذبة ،التي نستخدمها ....إخواني أهل القطاع ....لكم الـــــــلـــــــــــــــــــــــه ، الـــــلــــه وحده ....و ليس مستبد ، و لا جبار ، ولا مستكين خاضع . مهما بلغت طائراتهم عنان السماء ..فإن لله السماوات و الأرض ....و إلى الإسرائليين أقول : الحرب بيننا و بينكم سجال... فلا أنتم أنتصرتم النصر الختامي ( على شاكلة قبلة الوداع ) و لا نحن غادرنا الأرض المقدسة ....هل ترضون هذا لأهليكم ...لأبنائكم ....فإذا أرتضوه لنا فأنتظروا اليوم الذي يتمكن مسجونكم منكم !!! .....إخواني شهداء القطاع لسان حالكم يقول : يا من تعبرون الميدان مطرقين ، مُعلقٌ أنا على مشانق الصباح و جبهتي بالموت محنية ، لأنني لم أحنها قط حياً.

خواطر متناثرة

2008-12-23T08:03:00.000-08:00

1- بين ليلة و ضحاها قامت كل مقاهي مصر بإستبدال خدمة الإنترنت اللاسلكي((Wireless بأخر يُلزم إدخال رقم موبايل....وموال طوييل كده ...والله كأنهم مش عاوزين الناس يدخلوا على الإنترنت ! شـــــــــــــــــامة ريحــــة حكـــــــــــــــومة.
2- في كل أرجاء المعمورة كلمة Mid تعني منتصف
يعني في Mid roads و Midnight و Midday
اما في مصر ففي 1st midterm, 2nd midterm
و لو يطولوا يبقى في عاشر ميد ترم حيعملوها .
3-أهدي زملائي في التعليم المفتوح ، خدمة إجتماعية ، جامعة حلوان رائعة سيد درويش " أهو ده اللي صار" .
4-تصريحات السادة رئيس الوزراء و وزيري التعليم و التعليم العالي ....تبين بما لا يدع مجال للشك أن السادة المسئولين لهم مصْرَهم و أن لنا مصرَنا .
5- المُسافر إلى اليونان يلاحظ الشبه الكبير بين المناطق الساحلية في اليونان و الإسكندرية ....لكن شتان بين المصريين و اليونانيين ....
فخريستو عند اليونانيين هو صبي قُتل على يد شرطي ، و قامت الدنيا و لم تقعد على إثر الحادثة .
أما خريستو عند المصريين ، فهي الكلمة الأولى التي يتعلمها أطفال المصريين في مواجهة السلطة .
6-قالوا لي في صغري القلم سلاح ، و لكنهم لم يعلموا أن الحذاء أخطر سلاح .
7- ياااااااه يريتها كانت جت في وشه ....هذه هي الخواطر الإبليسية التي راودتني أول ما شاهدت حادثة الحذاء الشهيرة على التلفاز .
8-خـــبــــر عـــــاجـــــل : إجتماع عاجل للحكومة برئاسة الدكتور أحمد نظيف ، تبحث خلاله مشروع قانون يحظر على المصريين إرتداء الأحذية !! مالها الشرابات يعني .
9- قمت بكتابة قائمة بأسماء الأشخاص الذين يستحقون أن أقذفهم بالنعال أو الصرمة ، سمها ما شئت ...
لكنني أعتذر عن نشرها خوفاً من قضاء بقية عمري في لُقمان طرة .
10-أقترح على المتوجسين من ثقافة الحذاء الزاحفة من
العراق ، أنهم يفرضوا قانون يسمح للمواطن بإقتناء
جوز واحد من الأحذية .
10- سألتني إحدى صديقتي تفتكري لو كانت زيارة جورج بوش لمصر بدلاً من العراق ، كان ممكن صحفي مصري يلقي عليه الحذاء ؟!!
الإجابة بسيطة جدا: أي مصري حيفكر مليون مرة قبل ما يقزف حذائه اللي دافع في دم قلبه ....ماهو حيلاحق على إيه و لا إيه على الدوا و لا الأكل و لا التعليم لأ و كمان جذم هي ناقصة ؟!!
11- في المهدي المنتظر اللي أهل المدونات و شباب الإنترنت بيتخنقوا هو من نسل الحسن و لا الحسين ع. ، و كمان في ولي العهد المنتظر اللي ثلاث أرباع حالات الطلاق تقع بسببه . أما المنتظر العراقي ، فهو شاب وحد تصرفه العفوي صفوف أمة ...تتفجر فيها الصراعات .
12- زمان كان الغلابة بيكلوا فول و عدس ، دلوقتي بقى كيلو العدس ب12 جنيه سؤال بريء للسيد الوالي : يقترح معاليه على الغلابة يكلوا إيه ؟!!
13- بفضل المتحرشين بالفتيات ، و النساء في الشوارع و وسائل النقل العامة ، تحولت نسائنا إلى رجال ...يعني بقت البنت من دول تزعق و تشتم و تضرب بالقلم و ممكن تتضرب المُتَحرش بالشنطة أو بالجذمة .... تدوم المجدعة .
14- طوال سنواتي التسعة عشر ، ظننت أن الغانيات أو العاهرات يُعرَفنَ بسيامهن ..مسحوقات فاقعة على الوجوه ...و شعور ذات لون أصفر صارخ !! لكن نقول إيه لما واحد من راكبي السيارات يقف لبنت ، شكلها تعبانة و قرفانة و لابسة حجاب و هدوم عادية و شايلة شنط على قلبها ....عشان فكرها بنت ليل !! فيــــن الجذمة ؟!!
15- البعض يأكل الفول و الطعمية رفاهيةً أما الغالبية الساحقة فقد تلبدت أمعائها من أكلهما قهراً .
16- صدق اللي قال : البنت ملهاش غير بيت أبوها .
17-أتعجب من إخوانني الذين يدعون المصريين إلى
مقاطعة البضائع الأمريكية و الإسرائيلية !! و هل
قاطع المصريون شركات المحمول الثلاث أوالمصرية
للإتصالات ، أو شركات الأدوية أو حتى من يحرموهم
من قوت أبنائهم؟!! هل إمتلأت شوارع مصر
بالمحتجين على غلاء الأسعار ...هل يستطيع رجل
الشارع الذي لا يجد كسرة خبز يسد بها فيه عياله ،
أن يدافع عن أهالي غزة ؟!!

17- من علامات الأنوثة الكعوب العالية ....لكن بالله عليكوا ألبس كعب عالي إزاي في شوارعنا المليئة
بالنقر و الحفر ...يعني لما أتكفي على وشي في
.الشارع J
18- نفسي أعرف بأي صفة ناب جمال مبارك عن السيد الرئيس في زيارته لجامعة القاهرة .
19- بعد الضريبة العقارية و تجديد البطاقات ...سيتم فرض ضريبة على دفن الموتى ...و هو ده الجديد في
عالم الضرائب في مصر .
20- نداء إلى السادة القائمين على ماسبيرو يا ريت تدوني عنوان الفرن الآلي اللي بيطلع في نشرة الأخبار .

21- في بلدنا بنُطلق أسم الرئيس الراحل لأنه معندناش رئيس سابق ، كلهم بيتقتلوا الله لا يوريكوا .

أبحث مع الشرطة

2008-11-17T01:37:00.000-08:00

عارفين بقى شغل المخابرات و اللصوص و الأشرار و الحاجات الجامدة دي...الموضوع مثير جداً جداً ...بقى و أنا حديكوا ألغاز زي بتاعة المحقق كرومبو لعل و عسى تساعدوا البشرية في القبض على أتنين من المطلوبين للعدالة ..سنية الكشرية و سكينة على رقاب العباد ...

اللغز الأول : إيه العلاقة بين سنية الكشرية و أيمن الظواهري ؟
و يا ريت يكون منكوا خبير تعذيب في وزارة الداخلية و لا قناص في وزارة المالية و يقبضوا و لا حتى يموتوا سنية الكشرية لأنها خطر على الأمن القومي و السلم الدولي ...يعني نعمل إيه لو صحينا لاقينا في مصر ميت سنية الكشرية و ميت أيمن الظواهري ...يا روح ما بعدك روح

أولاً: الإتنين مكشرييييييييييين دايماً يعني يا إخواتي ميين شاف الظواهري مبتسم قبل كده ؟!! أهو الست سنية الكشرية زيه بظبط ...كشر للدنيا تتعدل
ثانياً: الإتنين بيشتركوا في نظرية مهمة جداً أن الناس كلها زي القطط تاكل و تنسى !! و ياما في السجن مظاليم..الفرق : إن الست سنية الكشرية بتقول اللعنة على الجيران المعفنين و الظواهري بيقول اللعنة على الحكام المطواتئين !!
ثالثاً :الإتنين شغالين من تحت لتحت في الخباثة
رابعاً: يغيبوا و يغيبوا و لما تشوف وشهم يعودوا يلموا فلان و علا ن و ترتان .
ثامناً: الإتنين بيهددوا غريامهم ( جمع غريم ياللا نحو و حركات) بالويل و الثبور و عظائم الأمور و في نفس الوقت عايشين في دور المستضعفة و البريئة ....أدييييينيييي عقلك !!
تاسعاً: كلاً من الست سنية الكشرية و الشيخ أيمن الظواهري يستحقوا أننا نقولهم ( رضي الله عنهما ) و ده تقديراً لمجهوداتهم الجبارة في التعبير عننا غصب عننا .
عاشراً : جاري البحث عن كل من أيمن الظواهري و سنية الكشرية في كل أرجاء المعمورة....و أي متستر عليهم حيقدم للمحاكمة بتهمة دعم الإرهاب و التستر على الإجرام ( عجابكوا كده هتخلونا نوريكوا العين الحمرا)

اللغز الثاني : إيه العلاقة بين سكينة علر رقاب العباد و تنظيم القاعدة ؟

و أحب أقلكوا يا إخونة إني و من كل قلبي أتمنى أن طونط سكينة يحصل فيها زي ما حصل في الحضري ( يعني عوزاها تتبهدل و يتشردلها في كل حتة ) و نظراً لعلاقة طونط سكينة بتنظيم القاعدة و كل التنظيمات الإرهابية و الإجرامية في العالم !! يا ريت حد من إخونا في الف بي أي يقبض عليها و يخلصني(أقصد يخلصنا كلنا منها).
أولاً : كل من طنط سكينة على رقاب العباد و تنظيم القاعدة بيتنافسوا على الحكم .....سكينة بتنافس أم بدوي جارتهم في مسابقة مين هينمشي البواب على عجين ميلغبتوش أما القاعدة فبتنافس ماما أمريكا عقبال عنكوا
ثانياً:القاعدة بتعتقد إن المسلم مالوش غير سلاحه و طونط سكينة بتعتقد إن البنت ملهاش غير بيت جوزها
ثالثاً:كلاً من طنط سكينة و تنظيم القاعدة بيرفعوا شعار محاربة البدعة .....ماعلينا طنط سكينة بتحارب البدعة اللي بتقول إن البنت لازم تحقق ذتها !!
رابعاً : التعليم هو الشغل الشاغل لطنط سكينة و تنظيم القاعدة ...القاعدة بتهتم بنشر السلفية الجهادية و طونط سكينة بتهتم بالتعلييم اللي يخلي البنات تجيب عريس الغفلة على بوزه....نقول إيه بقى حكم !!
خامساً : من مبادىء القاعدة : للمنتقبة الجنة ، للمحجبة الهداية و للسافرة البندقية !!!
من مبادىء طونط سكينة على رقاب العباد : للبنت الجواز ، للعانس العدل و للمطلقة الصبر و السلوان !!
سادساً : الإتنين بيؤمنوا بنظرية المؤامرة ....القاعدة بتؤمن بالمؤامرة ضد العالم الإسلامي و طونط سكينة بتؤمن بالمؤامرة الدنيئة لتعنيس بنتها بدرية
سابعاً : لكل من طونط سكينة و تنظيم القاعدة سجل إنجازات حافل ...بس للآسف تلت تربعه فشنك .
ثامناً : طنط سكينة و تنظيم القاعدة بيغييييبوا بيغيييييييبووووووا و يطلعوا علينا إيشي بقنابل و إشي إنفجارات ...يعني تفضل تقول كده ...و اتس نكست !!
تاسعاً : مقلكووووش يا إخواتي على الأسلحة اللي عند القاعدة و طونط سكينة إشي نووي و ذري و بيولجي و كيماوي ..يعني ممكن نسمي طنط سكينة ..سكينة كماوي ...و سلاح طنط سكينة لسانها ...لسانها بينقط عسللللل عسسسسل يا إخواتي.
عاشراً :ا لويل و الثبور و عظائم الأمور لكل من تسول له نفسه أن ينال من هيبة طنط سكينة أو القاعدة تصريحاً أو تلميحاً .
و أي متستر حنعتقله وفق لقوانين مكافحة الإرهاب و حيحرم من كل حقوقه المدنية (اللي هو محروم منها أصلاً) و زنبه على جنبه لما يورح جوانتنمو و يوعد عشر سنين هناك من غير ما حد يعبره ....و قد أعزر من أنزر.

المحققون الثلاثة

2008-10-22T16:20:00.000-07:00

زي كل يوم....في نفس الوقت و نفس المكان يدوي جزر الإنذار ...و يهب المفتشون الثلاثة ...و يتجهوا لموقع الجريمة المعتاد في فزع !!

ترااااااراااااا " التلاجة " آه والله و ما أعظمها من جريمة !! ...و يروح الفريق المختص إلى موقع الجريمة الحي دائماً بقيادة بابا !! ...و يقوموا بعمليات فرد وجرد و بحث واسع النطاق عن أي علبة فاضية أو أكل ناقص !!! و في نهاية الجولة الصباحية ( أصل في واحدة عصرية و واحدة مغربية مقلكوش بقى في جولة بعد كل صلاة ) ...بيكتبوا لستة بيهم ( أصل في لستة البقالة و لستة للخلص البقالة ...ده موضوع كبير ) و يرتفع صوت أخويه حماقة .....بحبه رغم رخامته أغلب الأحيان !! ....زنووووووووووبة أنتي ياللي أسمك زنووووبة نهارك أسود مطلعلوش صبح !!!

زنوبة : ليه كده بس يا حموقتي كفى الله الشر !!

حماقة :كنتي فين من الساعة 12 بعد منتصف الليل لحد الساعة 6 الصبح يعني لحد من خمس دقايق ؟!!

زنوبة : كنت نايمة في أودتي ....و يمسك حماقة زنوبة من ياقة قميصها و من كتر مكانتها العالية يرفعها فوووووق فوووووق لحد ما تلمس المروحة ( يا حبيبي يا خويه مكنتش أعرف أنك بتحبني كل ده :)).....أنتي بتكدبي ....متخلقش اللي يكدب على محمد باشا ( طب محمد و نعرفه لكن مين باشا بقى ؟!!) كنت فييييييييين إمبارح يا زنوبة .....

فجاوبته زنوبة : وهكون فين يعني يا محمد ؟ في أودتي طبعاً ولاقيت يا إخواتي شرر ...شرارة طلعة من عنين أخويه أي والله ابن أمي و أبويا ....طب أنت عاوزني أقلك إيه ؟!!

حماقة : عاوزك تعترفي إنك بتي إمبارح في التلاجة ...و دوى صوت رزعة ....إزاء إرتطام إيد المحقق حماقة ب.............. الطربيزة ( الحمد لله مجتش على قفاية :)) .....تفسري بإيه إختفاء برطمان المربة ؟!! يا حموقتي ما أنت عارف أنا مبحبش المربى !!!و هوووب فرقعة ولا بتاعة مدفع رمضان ....( المرادي حصل اللي كنت خايفة منه ....ضربني ....) زنوووبة قولي حاحا ...زنوبة : حاحا ...كدابة شامم ريحة المربى و البسطرمة !!! أنا حوريكي يا زنوبة ....أنا حدفعك التمن غاالي ...كل يوم تخلينا نايمين و تقومي على التلاجة حتتك بتتك ...و تقضي على الأكل ...أنا بتهياقلي تنقلي السرير بتاعك للمطبخ بدل المجهود الجبار اللي بتعمليه من و إلى المطبخ كل يوم!!! زنوبة : تصدق و نآمن بالله أنا كمان كنت بفكر في كده كررركركركرككرررررر أضحك يا حموقتي !! و مقلكوش بقى على اللي حصل بعد كركر دي عشان أنا عارفة الأطفال مبيحبوش العنف !!! اللا تفتكروا يا جماعة ....نشغل أخويا إيه ؟!!

أحلى واحدة في الحفلة ......زنوبة .....

2008-10-19T15:49:00.000-07:00

أقلكوا إيه بس أبويا و أمي بقوا في حالة بائسة ..... أمي وصلت لمرحلة بقت بتكلم نفسها و بتشتكي للعصافير اللي في بلاكونة ...و أبويا بقى بيشتكي للست سنية الكشرية !!! يعني الراجل بقالوا 50 سنة مستحملها و مستحمل شكويها ...لكن تقول إيه يا جبل تهدك ريييييييييييح ( الست دي مش حترتاح غير لما تجيبلنا كلنا إكتئاب ) دخلت على أمي في ليلة من ذات الليالي و لاقيتها بتكلم شركس ...و بتقلوا: أعمل فيها إيه بس يا شركس ؟؟ شايف البنات كلها بتنطط حوليها و هي قاعدة زي ستيتة ؟؟ طب أوديها لدكتور غصب عنها ...؟ أعمل إيه بس يا إخوااااتي ؟؟ و كالعادة مدهاش شركس عقاد نافع غير زقزقة ( ما أصل شركس ده العصفور بتاعي و صديقي الصدوق :)) , أما بابا فأفشته مرة بيكلم الست سنية الكشرية و بيقولها : أنا خايف أوي عليها يا حاجة لا يجلها زبحة صدرية أو نوبة قلبية و لا تتزف في الشوارع ..و لا تعاني من الصغط و السكر و نزيف في المخ .....يا ست سنية حياة زنوبة على المحك !!! ( معلش يا إخونة أبويا ضليع أوي في اللغة العربية :)) أكيد أنا عارفة حجم قلقكوا عليه :) طب يا جماعة صبركوا عليه ؟!! يرضيكوا أصطبح الصبح بوش حماقة ( أخويا ) و ألاقي بيغني أغنية عههعههه بكرها عمى و يقولي : صباح الخير ، هو القطر زاد كام سنتي من إمبارح ؟!! يا فتااااح يا عليم يا رزاق يا كريم !! أصطبحنا و أصطبح الملك لله !! أنزل الشارع ، أستنى صاحبتي قدام المترو ... و ألاقيلكوا الواد البياع متنحلي..... يوووه عاوز إيه ده كمان ؟؟ هو يوم باين من أوله أسود !!! ( و بسبب نصايح الست سنية ...يعني اللي يطنحلك ده يا هيخطفك يا حيسرقك !!) ده بيقترب بيقتربب بيقترررررررررررب علينا ....قلت أزق عجلي و أهو الفرصة المترو مليان عالم زي الرز ...إذ فجأة ألاقي واحد بيقولي : إيه يا بطة ؟ ....جتك نيلة روح أستحمى الأول ....أرجع من الكلية بعد المعركة مع حماقة و البياع السريح عشان ألاقيكلوا البومة و قفا على قفاية ...طونط سكينة عندنا في بيتنا ...يا مرحبا يا مرحبا ... لأ و إيه معاها بنتها بدرية المعصعصة و بعد التحية و السلام : لأ لأ لأ لأ يا زنوبة ملكيش حق أبداً حد يسيب نفسه كده ..طب حد يبقى شكله كده !! زنوبة كده مش حعرف أجبلك عريس ( أصلي نسيت أقلكوا هي تقريباً و الله أعلم بتشتغل خاطبة بعد الدهر ) .... و على آخر السهرة الشنيعة أقصد اللذيذة مع سكينة و بدرية ...أقفل عليه أودتي و أشوف قدامي يومي ...البياع السريح ، و طونط سكينة ....ماما و هي بتكلم شركس و بابا و هو بيشتكي لسنية الكشرية ....و أعود أعيط....لأ و إيه اللي زاد و غطى أني سامعة الأغنية اللي كان حماقة بيغنهالي في وداني ......يرضيكوا كده أصطبح على الصبح على : أحلى واحدة في الحفلة زنوبة الطخيييييينة !!!

-------------------------------------------------------------------------------------------------

مرسي لكل الناس اللي سالت عليه الفترة اللي جايه و مرسي أنكوا منستنونيش مع أني مكنتش بنزل بوستات و إنشاء الله حنزل بوستات لأنكوا بجد وحشتوووني كلكوا :))) وحشااااني يا محاااااااااااااسن :))

السياحة في خطر ..هي سمهللة ولا إيه ؟!!

2008-09-07T15:23:00.000-07:00

بصفتي واحدة من ولاد الزوات ....مقلكوش يا أخواتي على الكور الزرقاء اللي موجودة في دمي(أيوه يا جاهل منك ليه الدم الأزرق ده رمز للإرستكراتية أيون بالتاء و الكاف أصلي ركيكة ...مون ديو ناس إلتريت )....أنا مش راضية أقلكوا على المنطقة اللي ساكنه فيها عشان الناس بقت عنيهم تفلق الحجر....عشان كته بقى أنا سفراتي و جولاتي كتيرة أوي أوي...يعني ياما شربت الكوفي في الشنزالزيه و إتصورت مع الكانجرو (اللي هو الكنجر بالعربي ...ما إحنا برده فصيحين يا باشا) ....و أودتي فيها إشي خزف من الصين و سجاد من إيران و شوزس من إيطاليا....يا عالم بقلكوا دم أزررررررررق أزرق يا إخونا ......

شكلكوا فكرني بهتش .............طيب تعالوا بس و شوفوا أودتي .....مش حتلاقوا فيها أي حاجة من الكلام ده و الله ...و هرباً من طونطي سكينة ..سبتلها البلد و هجيت ..و لا بيه و لا عليه يا إخونا ...ركبت الميكروباز ..(و هو باز فعلاً يعني مقلكوش على الشباب اللي زي الورد اللي الميكروباز بيبوز بيهم على الإتستوراد ..و ينزلوا يزقوه ...يقوم المشكوك في قلبه السواق يجري و يسبهم ...ما أهو اللي يعيش يا ما يشوف يا جماعة ) ....و صلت يا إخواتي الحمد لله من غير أي غرامات من بتوع قانون المرور( و ده بفضل الست سنية الكشرية و الرقية بتاعتها يعني أقعدت تبخرنا قبل ما ننزل و تقول: "وجعلنا من بينهم سداً ومن خلفهم سداً فأغشيناهم فهم لا يبصرون" ربنا يعمر قلوبنا بالإيمان يا رب ) ...و أنزل يا ناس ...و ألاقي المطار ...بقى فضي كده و مزهزه ...يا حلاوة يا ولاد ...يا حلاويه ...عملوا المطار من الفضة ...شفتوا زنوبة أتنصفت إزاي !!....و قربلكوا من البوابة وألاقيلكم بسم الله ماشاء الله رتب يا خواتي كده مرصوصة ...و دبابير ...دبابير ...فعلاً يا إخونه الشرطة في خدمة الشعب .... فأعدوا بقى يخدوا نفسهم و الناس بقى لايصة و العسكري الغلبان عمال بقى يصرخ و يقول يا إخونة ...اللي معاه بسبور يخش و اللي معهوش ..طريقه أخضر ..إن الناس يا خونه يختشوا على دمهم و يمشوا أبداً. كلهم مبرشطين ...و يا لهوي على الأمم اللي كانت واقفة يعني ناس ناس زي الرز ( إلا هو الرز بقى بكام دلوقتي ؟!)...و مقلكوش بقى على السعادة اللي ببقى فيها في أي زحمة يعني كل المتربيين في الخليج زي ...اللمة و الزحمة يا إخونا دي أمللللللللللة ....و بعد أن تم المراد بإذن رب العباد ( كلمتين حلوين أهم ) ...و دخلت المطار من جوه (أيون من وره الإزاز المتفيم ) ....سلاماً قولاً من ربٍ رحيم لاقيت بني أتمين من كل صنف و لون , أمم يا أخواتي أمم من كل صنف و لون يا حلاوة و الله و وراسك بقت براس السياح و الأجانب يا زنوبتي ...و مقلكوش على الإنشكاح اللي أنا كنت فيه يا كماعه ...يعني أنا طول عمري نفسي أزور زنقة الستات ...أهو ربنا حققلي مناياه و جبلي زنقة الستات لحد عندي ....(و الإنشكاح ده حاجة مهمة يعني مش بتشفوهم في الإعلان بتاع : نورت مصر ..كلهم فتحين بقهم إزاي ...و كمان لو كشرنا السياح حيجلهم إكتئاب و يطفشوا ) ...

ما علينا ....بدأ بقى العرق (طلع حتى السياح يا جماعة ما بيستحموش )....كان في طونط وراية فكرتني بطنطي سكينة ..عماله بقى تشبشب لجوزها في المطار ( خلت رقبتنا زي السمسمة قدام العرب و الأجانب ...يا فضيحتك يا مصر )..و إذا فجأة في وسط موجة العرق العارمة اللي فكرتني بموجة الحر العارمة اللي بتجلنا من الهند كل سنة ....لاقيت سنانها الصفراء دي بانت ( بينلها عمرها ما شافت فرش و معاجين ) .....كابتن ...( مش حقول كابتن عمرو زكي عشان ما يبقاش إعلان ) و بصت شزراً لبنتها و قالتلها : روحي يا فوقية إتصوري يا بت معاه مكونتيش قادرة تجيبلنا شاب حليوة كده و بعضالات زيه بدل السنكوح المعصعص خطيبك ....جتكم نيلة يا ولاد .......( حزف اللفظ بناء على رغبة الرقابة ) ...يعني يا إخونا شوفتوا الفضايح اللي بتحصل في المطارات ........ و دي الحاجة الوحيدة اللي بيندفوا الشوارع ..و بيفرشوا الأرض رمل و ورد عشانها ...يعني لو مفيش سياح ننظف الشوارع لمين ؟بعدين لما السياح يطفشوا نأكل منين ...أصل دي الحاجة الوحيدة اللي الحكومة لسه معملتلهاش كدر.... يعني دي مسألة حياة أو موت و لازمن نقف وقفة هامة .. هي سمهلهلة و لا البلد مفيهاش نظام و لا إيه !!! و في الختام اللي مجتلوش الفرصة إنه يروح محطة مصر أو العتبة عشان يتفرج على الزحمة ممكن يروح مطار القاهرة و حيلاقي العتبة عند

مرسي أوي لكل الناس اللي سألت عني أثناء غيابي و بالأخص حنين صاحبة مدونة أيام و عيشتها و رنا صاحبة مدونة يوميات نائمة في الأرياف و محاسن صاحبة مدونة عايزة أتطلق و أنا كنت مسافرة لأهلي في قطر و ده اللي حصلي يا إخونه في المطار .

اللي أختشوا......إنقرضوا !!

2008-08-21T14:04:00.000-07:00

على الرأي السيد اللمبي , و مقولته الشهيرة : يا منطقة مفيهاش راجل !! ... يعني في حالة زي دي الشارع كله بيقلب عبيط و مش واخد باله مش لازم نعمل عجقة و أزمة مرورية عويصة..يا عيني على المجدعة ...و أنا ناوية أكلمكوا على الظلم ,و فكروني أقولكم السبب بقى ورا الحكاية الطويلة العريضة ...بس يا رب ما تملوش مني :)
يعني لازم الإنسان يا جماعة يعترف بالحقيقة و لو تكون على نفسه ....يعني لازمن و حتمن ...نعترف بالحقيقة الصعبة و الواقع المر ...آدم مش واخد حقه في المجتمع !! و حواء دي من الآخر عاوزة قطم رقبتها .... الله يرحمك يا سي سيد الله يرحمك و يرحم أيامك !! و الله الستات أحتلوا البلد يعني بقوا مسكين كل المناصب فاي رئيس او وزير او حتى غفير كلهم من النساء و مجلس الشعب الطويل العريض ده مفيهوش غير راجل واحد!!! .... تنزل السوق تلاقيهم مستولين عليه و منعوا دخول الرجاله ..و ضرب و شتايم و معاكسات و آخر قلة أدب و آدم الغلبان يسكت و يبلع المرار عشان الناس ما بترحمش...يعني الولد المحترم ما يخشوش القسم غير عشان يعمل البطلقة لكن ...يروح يعمل محضر يتهم في بنت أنها عاكسته و لا تحرشت بيه ....يا عيب الشوم !!!! أنت عاوز نبقى لبانه في بق اللي يسوى و اللي ما يسواش!!...و من كتر الإضطهاد و قلة أدب حواء عملوا عربيات مترو ليه لوحده ...و ده عشان يحموه من حواء ...و مقلكوووش على المترو و اللي بتعملوا الستات في الرجاله المساكين المغلوبين على امرهم في المترو و الأتوبيسات ..يعني على رأي المثل اللي أختشوا إنقرضوا!!...و كمان لما يروح يتقدم لوظيفة يرفضوه عشان هو راجل ..يعني و يوطفوا بنت مكانه حتى لو معاه دبلون..منك لله يا قاسم أمين أنت سبب البلاوي دي كلها.ده غير أن الاب و الأم بيفضلوا أخواته البنات عليه فبيطلع آدم عنده نقص حنان ....و بعدين يتجوز واحدة مفترية زي طنط سكينة على رقاب العباد (حبييييبة قلبي ) تكفروا...و تطلع روحه وتهريه ضرب في الشارع من غير لا إحم و لا دستور....و هكذا يعيش آدم الغلبان مقهور من المولد للمات ,و يستمر صراخه الممزوج بالعبرات من ساعة ما خرج من بطن أمه لحد ما أتلف في كفنه.....و أنا أقترح أنه الحل عشان نقضي على هذا الظلم في حق آدم لازم ندوق حواء بعض الذل الذي يعاني منه آدم..و أقترح أنه يكون في يوم وطني نقوم بتبديل الأدوار يعني الرجاله تعامل الستات زي ما حواء بتعاملهم يعني ممكن تحس بآدم الليس طافح الكوت في تربية عياللها ...و هي بس بتخونه و هو يا حرام مستحمل خيانتها عشان عياله !!! آه كنت حنسى ...سبب أني بقيت ماسكوليست ( يعني مناصرة لحقوق الرجل ) هو أني شفت بواب العماره اللي جنبينا ضرب مراته و لم عليها الشارع كل ده عشان مرضتش تديلوا مرتبها من الشغل في البيوت ...عشان يصرفه لأنها عاوزة تشتري بيها حاجات للبابي اللي حتجيبه كمان كام شهر عقبال عندكوا جميعاً!!!!!! حد فاهم حاجة ؟!!!!

خبر عاجل : زنوبة لبست التاج عقبال عندكوا جميعاً

2008-08-16T12:18:00.001-07:00

يا ناااااااااااااس يااااا هووووووووووووه أسمعوا و أعوا و أتلموا و أتجمعوا و ليبلغ الحاضر الغائب و اللي سامع اللي مش سامع ....زنوبة جالها تاج آه و الله يا جماعة زي ما بقلوكوا كده جالي تاج و التاج ده من Fire Bird ...........

ربنا يخليها ليه يا رب :) و أنا بعتزلها على التأخير و السبب هو إني كنت تايهة و هي يا حرام أتقطع نفسها و هي بتدور عليه :)

ياللللاااا بقى سمع هوس و بسم الله و استعنا بالله على الشقى :)
س 1-أذكر 5 أحلام على الاقل تخص ماضيك وتحلم فيها بتغيير أشياء ماذا ستعدل وماذا ستترك ؟
1-من ساعة ما كنت زغنونة و أنا بحلم أني أدخل هندسة بس و بعد أن فقت على الواقع المرير للتعليم في المحروسةو دلوفقتي نفسي أدرس هندسة في أمريكا.
2-كنت بحلم أني أبقى تحرية ديدتكتيفيعني...معرفش بينلي تأثرت أوي بالمحقق كونان ...و عارفين بقى أنتوا البوليس و اللصوص و الحركات دي هههههه المهم تخليت عن الحلم ده نهائياً لأني أكتشفت أني معرفش أرمي طوبة على حد أصلاً .
3-حلمت برديك أني أكون مذيعة نشرة أخبار في قناة الجزيرة و كنت بمسك الجرانين و أقول قناة الجزيرة في قطر و موجز لأهم الأنباء ياللاا محدش عارف نصيبه فين ليه لأ ؟ و ساعتها حقرأ مدونتكوا كلكوا على الهواء (يالااا أي خدعة :))
4-كمان حلمت في الطفولة أني أكون ممثلة و مغنية لكن لأن مصر ملهاش حظ محدش تبناني فنياً هههه و كنت ممكن أجيب أوسكار أو جولدن جلوب أو ميوزك أوارد يا عيني على حظك يا مصر مالكيش في الحلو نصيب .
5-و كتير جداً جداً بحلم أني ألف الوطن العربي كله و تركيا و إيران بالسيارة (اللي هي العربية يعني ) و أني أخد سنة كاملة أجازة ألف فيها الدنيا كلها و أتفرج على العالم .....لكن هذا الحلم مؤجل لحد ما يجي بسالمته العريس اللي أمه دعيه عليه و حيتجوز مجنونة زي هههه :)
................................................................
س 2-أذكر 5 أحلام على الأقل تخص مستقبلك ؟
1-نفسي أكمل دراسة هندسة في جامعة كولمبيا في أمريكا .
2-بحلم أني أزور المسجد الأقصى المبارك و أمشي في شوارع القدس و أصلي و لو ركعتين هناك لكن السؤال هو : هل أنا أستحق هذا الشرف ؟.
3-نفسي أوي أوي إني أعمل حج أو عمرة لأني حاسة إني هكون مستشعرة الروحانيات أكتر من زمان، و نفسي أوي أزور قبر النبي و أقوله : وحشتني يا رسول الله .
4-أنا بموووووووووووت في اللغات .. و نفسي أتعلم لغات كتيرة أوي و أحسن اللغات اللي بعرفها عشان بحب أوي إني أتعرف على ثقافات مختلفة.
5-آه نسيت ،أنا بموت في القراءة و المزيكا و نفسي أوي إني أعمل مكتبة كبيرة أوي (أكون أقرياها طبعاً مش حطاها ديكور يعني ) و نفسي أحضر حفلة لمرسيل خليفة أوي أوي أوي

س 3-أذكر شخصين على الأقل متواجدين في حياتك حاليا .. كنت تود وجودهم قبل الآن بزمن ؟
الحمد لله كل الناس الموجودة في حياتي أو بمعنى أصح اللي أنا بسمح بتواجدهم ناس بحبهم أوي أوي و بموووووووت فيهم الحمد لله بس في تلت شخصيات يا ريتني عرفتهم من زمان أو كان ليهم دور ليه في حياتي من زمان

الأولى : هي عمتي و اكيد كلكم مستغربين هو أنتوا كنتوا مقاطعين عمتك ولا إيه ؟!!! لأ هو الحكاية و ما فيها أني طول عمري عايشة بره مصر و السنادي أول سنة ليه هنا لأني قررت أني أكمل دراستي الجامعية في المحروسة

الشخصية الثانية : أنتيم رقم ون : ياسمين يعني على الرغم أني معرفهاش من زمان لكن بينا ذكريات كتيرة أوي أوي و بنفهم بعض أوي أوي حتى من غير كلام...و لما ببقى متوترة بحب أتكلم معاها أوي.

الشخصية التالتة : أنتيم رقم تو : ندى ..ندى دي أنا بموت فيها يعني بجد طيبة أوي أوي و برتاح موت لما بتعد نرغي مع بعض و بنعمل حاجات مجنونة كتير سوى
س 4-أذكر شخصين على الأقل غير متواجدين في حياتك حاليا .. كنت تود وجودهم الآن أو في حياة أولادك مستقبلا ؟
1-أولاً أكيد الرسول الأكرم -صلى الله عليه و آله و سلم - يعني نفسي أني أشكيله همي و أسمع منه ..يعني بجد الدنيا كلها مفتقداك يا رسول الله

2-نور الدين زنكي ..اللي هو معلم صلاح الدين الأيوبي و الراجل ده هو أكتر شخصية تاريخية بحبها على الإطلاق و كان في كلمة كان بيقولها في شبابه لما كان بيشتكي أنه تافه و مش متدين (معرفش أنا بقى أقول إيه على نفسي ) بتقول : الله ناظري الله راقبي الله حافظي ، كانت الكلمة دي بتساعدني و بتقويني ...الله يرحمك يا زنكي مين يطول أنك تبقى معلم أولاده.

3-بسلامته أبو العيال ...لو حد لاقاه يبقى يقولي ههههه بس يا ريت ونبي يكون شخصية محترمة يحسن أنا مليت من الولاد التافهه اللي معايا في الكلية ربنا ما يحكم عليكم خناقات بقى على طول ....جتنا نيلة في حظنا الهباب.

س 5-لمن تهدي هذا التاج ؟

ناس كتيرة أوي أوي و يا رب ما أنساش حد ...

1-أهديه لساجي صاحب مدونة حلم وسط الضباب و هو صاحب أول تعليق على مدونتي و موصفلكوش أد إيه أنا أتبسطت أوي أوي من التعليق ده و قعدت أقراه و أطنطت زي العيال و أتشجعت أني أنزل بوستات جديدة...

2- ريم صاحبة مدونة ريم البراري المستحيلة ....هدية على قد المقام.

3-ندا منير صاحبة مدونة التحدي ما هو إلا أكبر دليل على إثبات ذاتنا ،أنت عسولة أوي أوي و أنا حابه أني أديكي التاج.

4-نعكشة صاحبة مدونة حاجات كده....جااالك تاج يا نعكشة سرحي شعرك بقى.

5-حنين صاحبة مدونة أيام و عشتها ..و هي صاحبة مكان و مطرح و تشاركني الكثير من الأفكار المجنونة ..خذي التاج و متكسفيش يا حنين.

6-Seven

صاحب مدونة مش عارف ألبس التاج و شوفه كده يا رب يطلع مظبوط عليك.

7-سالي صاحبة مدونة حاجات جوايا....اقل حاجة أعملهالك يا جميلة

8-رنا صاحبة مدونة يوميات نائمة في الأرياف ...بجد الفضول حيموتني هتقولي إيه .

9-العراف صاحب مدونة كلام الليل ....نفسي أعرفك أكتر .

10-محاسن صاحبة مدونة عايزة أطلق و ......الفضول حيقتلني و يا رب التاج يناسبك.

11-أليس في بلاد العجائب صاحبة مدونة آه منك يا دنيا ....نفسي أعرفك أكتر ..

12-Free killer take the crown and run

و فكيييييك يعني :)

13- نبيل صاحب مدونة فوح الياسمين

14-حسن حنفي صاحب مدونة Shiva

و مرسسسيييي تاني يا فير بيرد و سوري بجد لو نسيت أي حد يبقى العتب على الزهايمر .....

و أنا واثقة و متيقنة إيه شعوركوا دلوقتي ....

تلاقيكوا بتندبوا حظكوا أنكم و قعتوا في إيد واحدة رغاية زي ......هههه

معلش بقى .............لووووووووووووووللللييييي (زغروطة يعني :)) و الله و لبستي التاج يا زنوبة..يا حلاوة يا ولادة يا حلاوة ...نجاملكوا في الأفراح....فوتكوا بعافية :)

نشكر لكم قوة الصبر و طولة البال .....كانت معكم زنوبة من خلف الكيبورد قدام كشك عم أحمد ، جمهورية حلوان

و السلام عليكم و رحمة الله

النباتيين قصراً .....و رمضان كريم

2008-08-11T19:13:00.000-07:00

كان يا ما كان ، يا سعد يا إكرام ، وما يحلى الكلام إلا بذكر النبي عليه أفضل الصلاة و السلام ....كنت أعدى في بيتنا عادي لا بيه و لا عليه ...أعده ريلاكس كده و قررت أستجم و أكافح ضد التوتر.....و في ظل هذا الجو المليء براحة البال...إذ فجأة لاقيت درجة حرارة التوتر بتعلا في الأودة ....و إذ بزعابيب شرقية غربية ...تأتي من الباب .....و مين قصادي ؟؟!! تفتكر مين؟؟!! طنط سِكينة حبيبة قلبي ( أيواً سكينة على رقاب العباد) مكشرة و مده بوزها...و قولت في نفسي : يا عجبي أهو اللي بتعملوا فيه طلع عليها!! ...كان وشها زي حبة الأوطة (أصل السلم عند متعب أوي) و جبينها متقسم كروهات (عكس كل خلق ربنا ) المهم : قلتلها: مالك يا طنت سكينة؟؟خير ؟؟ ...و اللي حيتابع مدونتي بعد كده ، حيعرف دور طنت سكينة على رقاب العباد...و دورها الإستراتيجي ....العقد اللي عندي :) ...المهم طنت سكينة قعدت تزعق و تقول منهم لله ....الناس ماشية تكلم نفسها في الشارع....., و بيدعوا على حسني مبارك و نظيف!!! و طبعاً أنا فوجئت و قلتها يا لهو بالي ...إزاي ؟ هما جرى في مخهم؟!! فقالتلي : اللحمة يا بنتي عمالة تغلى ...و الناس حتلاحق على الغلا و الكوى و السكن و الدروس و كمان اللحمة و رمضان داخل يعني الناس حتاكل إيه في رمضان؟ تمر ............... و طبعاً لم يفاجئني تفكير طنط سكينة على رقاب العباد.....يعني دي ست جاهلة ...و كل مصري وطني لازمن يؤيد السياسة الحكومية في تغلية أسعار اللحوم .....قولي ليه ..........قلت:ليه ؟
تعالى أفهمك : اللحوم الحمراء دي كلها أضرار يعني كل ما الناس تاكل أكتر لحمة....كل ما الكليسترول يعلى و التخمة اللي في راس تزيد..و نسب الزبحات و أزمات القلب ترتفع ....و أعداد الوفيات تزيد و ....و و الإنتاج يقل و سعر العيش يغلى و كمان اللحمة سبب تخلف المصريين و كسلهم....لكن لما أسعار اللحمة ترتفع ...الناس حتبطل تشتري لحمة يعني عملة إضافية و نقدر نصدر الفائض للخارج !!! ده غير أن اللحمة أحد أسباب أرتفاع نسب الطلاق في مصر!! ليه بقى ؟!! لأن كل الرجاله بيتخانقوا مع مراتتهم عشان بلسعوا اللحمة و عادة ما تنتهي معركة اللحمة بالرجل يرمي يمين الطلاق!!! . و هكذا حيتحول المصريين من أكلة لحوم بشرية اقصد حيوانية إلى نباتيين بالإكراه و هو ده الجديد ...و نباتي يعني لا كلسترول و لا ذبحة و لا مصاريف تترمي في الأرض يمين و شمال و مقلكش على الهمة و النشاط و الخفة اللي الناس حتبقى فيها :) و الإنتاج يزيد و الخير يَعُم .....و تحيا مصر

___________________________________________________________________

كل سنة و الأمة الإسلامية كلها بخير بمناسبة شهر رمضان المبارك.....رمضان كريم و عساكم من عواده و عظم الله أجوركم ...

و شاء الله السنادي إني أبتدي الإستعداد لرمضان مبكراً (و أكيد استعدادي مش للأكل و العزايم و السفر و الكلام ده لأني مليش دعوة بالكلام ده :)) لكن ابتديت أقرأ قرآن مبكراً و أحضر دروس و أركز في قيام الليل يعني حتى لو ركعتين بس ....لأني نفسي بجد ربنا يكرمني و أوصل للقلب الشفاف اللي بحلم بيه ....نفسي أن محبة الله و نوره تظهر على وشي و تصرفاتي ....نفسي أحب خلق ربنا كلهم ..لا لشيء سوى أن فيهم نفخة من روح الله .....نفسي محبة الله تخليني فتحه أديه و أحضن العالم كل بإيدي ....لأني متيقنة أني في الدنيا دي مش لوحدي .....أنا معرفش أدي نصايح في الدين بس أنا حقول على اللي ناوية أحققه رمضان ده إنشاء الله و أواظب عليه لو ربنا أداني الحياة
أولاً : أقرأ قرآن نص ساعة كل يوم ...أو حتى أستمع إليه المهم إن القرآن بإذن الله يكون شيء أساسي في يومي
ثانياً: أصلي ركعتين قيام الليل كل يوم إنشاء الله
ثالثاً:عاوزة أتفكر في ربنا ...أغلب الوقت , عاوزة أحس بربنا أكتر
يا رب أرزقني حبك يا رب أجعل محبتك أكبر حب في قلبي ...و أنر بنورك الظلام اللي في نفسي ....يا رب خد بيدي و أجبر بخاطري يا جابر كل كسير ....يا إلهي يا ربي يا مالك الملك ....أكفينيهم يا رب
اللهم صلي على محمد و على آل محمد

القمر يبتسم لي

2008-08-07T14:18:00.000-07:00

في بداية مراهقتي حين كنت أختلي بنفسي بضع لحظات في غرفتي ...أفتح النافذه و الشباك السلكي الذي كنت أرفض إغلاقه بشدة على الرغم من إعتراض أمي المستمر!!. كان إغلاقه يشعرني أنني سجينة هذه الغرفة التي لا يمكنني الشبابيك و النوافذ الموصدة فيها أن أطالع و أرنو إلى السماء.كنت أقف أمام النافذة المفتوحة للحظات أو دقائق أُ ُحيي قبل نومي ...كنت حين أنظر إلى وجه القمر ...يخيل إلي أنه ينظر إلي و يبتسم !! بل أقسم أنني كنت أستطيع أن أرى ملامحه...ذلك الوجه المحبب إلى قلبي ...ذلك الوجه الذي يسهرني الليالي الطوال ...دونما أن أعرفه أو أقابله !! بل أنني لا أعرف أين سأقابله أو كيف أو حتى متى؟!! لكن خيالي كان يصور لي حينها أنه هو أيضاً ينظر إلى القمر مثلي و يبتسم حين أبتسم و أنه يراني و أنا أبتسم أيضاً.....لا أدري هل هي أحلام شابة عادية أم خزعبلات طفلة تنازع غيرها ما يملكون؟!! لم أبُح بهذا لأي أحد ، كائناً من كان ....لأنني لم أشأ أن يظنني البغض مجنونة أو بنت قليلة الأدب عاوزة تتجوز !! فأعتبرت هذه الخواطر أو الخزعبلات ، هي سري الذي لا يحق لأحد أن يشاركني فيه ...فلم أشأ أن أسمع جملة : كفاكي أحلاماً ، أنظري حولك...بمرور الوقت خفت الجذوة ...لا أدري هل هي الدنيا و الإنشغالات أم أنني أصبحت عاقلة ؟؟!! . الكل من حولي متشآم . الكل يرى أن هذه الأرض مجنونة لا مكان لعاقل فيها!! الكل يقول لي أنه لا وجود لهذا الحب المزعزم..و أنه من يشتهيه لن أجد يوماً هذا من تريدينه !! إلا إذا كان يكبرك بعشر أو خمس عشر سنة ...يعني سأتزوج رجل في عمر خالي !! و البعض الآخر يهاجم أية فتاة في سني تتحدث عن هذا الموضوع ...فالبنت المحترمة هي التي تلتفت إلى دروسها و تكون مثل العسكري !! يعني حاجة كده شبه الشويش عطية!! و كأن أن تجد فتاة مثلي من يشاركوه طموحاته و إهتماته هو الكثير ، الكثير الذي لا يمكن أن تجده في العالم المجنون اليوم!! ...هل حلمي أسري بعيد المنال ؟؟ هل هو ضرب من ضروب الخيال ؟ . هل أن أجد من يشاركني شرب كوب النسكافيه في الشرفة و مطالعة الصحف في الصباح ...هل أن أجد من يشاركني نزهتي الأسبوعية ، التي أسير فيها حتى التعب!! هل أن أجد من يصحبني إلى حفلات عُمَر خيرت و ملرسيل خليفة أو الأوبرا...هو الحلم الُحال؟!! هل أن أجد من أصلي معه قيام الليل أو من يجلس معي أنا و أبنائي لنقرأ القرآن الكريم ...أو من يضع أبنائي على حجره ليقرأ لهم الشعر أو القصص ....هل كل هذه أضغاث أحلام ؟!...البعض يرمقني بنظرات التعجب ...فلا يمكن الصعود للقمر عبر سلم خشبي!! ..و البعض الآخر يتندر علي قائلاً : لم نركِ يوماً تذهبين لأياً من حفالات الأوبرا؟!! ....قالوا لي : لا تعشقِ حتى لا تحترقِ ..أنت فتاة و ليس العشق للفتيات..حسناً أنا فتاة ..و سأعشق لأن الله لم يخلق فطرتي لتُهلكني...مهما قال الناس من حولي ...و مهما كَثُر التندر علي...فسأظل أرنو للقمر من نافدة غرفتي ... سأجد ذلك الحب الذي يجعلني أتلمس أشعة القمر الفضية بيدي ...

خيالات طفولية على شاطىء البحر

2008-08-06T09:45:00.000-07:00

في صغري ؛ كنت أنظر إلى غروب الشمس على شاطىء البحر ....و كان منظر غروب الشمس و سط الشفق الأحمر من أمتع و أحب المناظر الطبيعية إلى قلبي ....و لأنني نشأت في قطر ( و هي شبه جزيرة)....كان عندي مفهوم غريب عجيب عن غروب الشمس ...فقد كنت أعتقد يقيناً أن البحر يبتلع الشمس عند الغروب و أن مياه البحر تُغرِق الشمس عند المغيب !!! فلم أكن قد تعلمت أي شيء عن الجغرافيا و الفلك ...لكنني كنت في الصغر ، أعتقد كثيراً في قوة البحر ، التي كانت تفوق الشمس في نظري ...فالبحر يغرق الشمس عند المغرب و يقذفها إلى السماء عند الشروق !!!
الآن و قد أقتربت من سن الشباب ، أدركت تماماً أن نظريتي التي طورتها عن الشروق و الغروب لم تكن ذات أي أساس ..إنما هي خيالات طفولية . الآن أحب كثيراً الجلوس على شاطىء البحر ، و أن تداعب قدمي حبات الرمال المعطرة بنسيم البحر و أشاهد الغروب ، حين يبتلع البحر الشمس....الغروب أحيانا يفرحني و أحياناً يبكيني ....أحياناً أشعر أن آلامي و همومي تغرب مع غروب الشمس وسط الشفق ...., أحياناً أخرى يذكرني الغروب بالأحباب الذي فُرِض على فراقهم ،دونما كلمة وداع واحدة......في صغري كنت أترك خصلات شعر تنسدل و تعصف بها الرياح البحرية هنا و هناك ...و كنت أترك العنان لقدمي لتركض على الرمال ، حافية ....و كنت كأنني محبوبة نِزار قباني في (حافية القدمين) ...كنت أعتقد أنني أستطيع أن أحافظ على بشرتي الطفولية ...بالسير حافيةً على شاطىء البحر ، فحبيبات الرمال المعطرة بنسيم البحر ستزيل جلدي الزائد...مثلما تنقيني مياه البحر ....كنت أنتظر أن أجد يوماً إحدى الصدفات أو القواقع التي تجيبني حين أحدثها ، و التي تسمعني صوت البحر في أذني حتى يصيبني النعاس....لكن طال إنتظاري و كلت قدمي دونما أن أجد صدفتي المنشودة......الآن ، حين أجلس على شاطىء البحر و أتذكر خيالتي الطفولية حول البحر بقوته ، سلطانه ، جماله و روعته ....أبتسم لقدرة عقل الأطفال على التخيل ...فهم ينامون فيحلموا بأنهم أبطال أفلامهم المفضلة ....لا أملك الآن سوى أن أبتسم و أنحني ، حين أشهد الغروب على شاطىء البحر.

و راجعلك يا إسكندرية :]

2008-08-02T13:52:00.000-07:00

إحنا قافلين عشان راحة أصيف عقبال عندكو كلكم :):)

و المصيف مرتبط عندي بذكريات كتير حلوة ...البحر و البلبطة اللمة و صحاب المصيف ، كريم و ندى....السوبر ماركت اللي جنبنا اللي كنا بنشرب فيه بيبسي ،محل الآيس كريم اللي كنا بنقف قدامه لساعات و ساعات ...جيرانا و خناقتهم اللي تضحك من تفاهتها ...أخويه الصغير اللي كان بيجري كل ما موجه تقرب منه عشان خايف لا يغرق و إلي لما حاولنا نعلمه السباحة كان خايف يبل رأسه و كان عمال يبلبط بإيده و ينهج من الرعب ، إبن خالتي اللي عنده هسهس إن أي حد بيبص نحيتنا يبقى بيعكسنا ، الحظاظات اللي بنشتريها من الشارع ،و محل الزلابية اللي جنبينا و البلياردو و خروجتنا الجماعية بليل ...و الفرحة اللي كنت بحسها لما أروح البحر بليل مع أني مش شايفة حاجة......ياااااه حاجات كتيرة أوي صغيرة بس جميلة أوي أوي

أيوووووووووووووووه

و راجعلك يا إسكندرية :)

مرآتي تبكيني

2008-08-01T14:54:00.000-07:00

ألم تحدث لك سابقاً ....أن تستيقظ ذات صباح....
و ترغب بالنظر في المرآة
فتقف محدقاً في تلك الصورة المرتسمة أمامك
ذلك الوجه ، هذا الجسد و تلك الملامح
ترى روحك مرتسمة على جوانب وجهك
لا وجود لهذا الإشراق و ذاك الرونق الطفولي ...
و أختفى ذاك الوجه الطفولي...
فلا تجد سوى العبرات تلو العبرات
تسيل على خدين ألهبهما الحزن
أين ذهبت تلك الروح ؟!!
حتى أصبح إنعكاس مرآتي يبكيني
لا أدري لما ...
بلى لأنني نفسي لست راضية ....
لكنني أجد وسط دموعي المنهمرة ....
ألُهم خاطر....
أنني على الرغم من العواصف الشعواء من حولي ..
سأجد طريقي وسط الغيوم
حيث أنتمي .....
لا لن أبكي حين أنظر في مرآتي
لكنني سأبتسم
فالحياة أقصر من أقصرها ....
و غداً سينقشع الظلام ، ستنجلي الغيوم
و ستسطع الشمس

ملحوظة : يا جماعة ده مش شعر دي خواطر وهي لا فيها لا وزن ولا قافية

الفاتحة على روح المرحومة

2008-07-31T17:40:00.001-07:00

أسدل الستار منذ أيام قليلة على القضية التي أثارت اللغط و القيل و القال في الشارع المصري بل و في الأوساط العالمية

أيضاً ...."العبارة 98" و يعني يا جماعة الإنسان لازم يقول الحقيقة و لو على نفسه ؟ يعني إحنا غلطانين و الغلط

راكبنا من ساسنا لرأسنا !!! يعني إحنا ظلمنا ممدوح باشا و عمرو باشا يعني أكلنا لإتهامات للرجلين البريئين المظلومين يعني هما يعملوا إيه ؟!! ده كله كان قضاء و قدر ...يعني دي إرادة السماء و كلنا خدام لإرادة السماء.... ربنا عاز كده هو اللي أمر عزرائيل عليه السلام مش ممدوح باشا اللي أمره أنه يقبض روح ألف واحد في عرض البحر !! لكن إسماعيل باشا ده راجل سمعته زي البرلنت مفيش غبار عليه ...ده من كتر إنجارته على الصعيد ؛ عين بفرمان جمهوري في المجلس الموقر (أبو حصانة ) ....و ده إن دل على شيء دل على الإنجازات الجبارة للرجل على الصعيد الوطني و على رأسها إحتكاره للنقل البحري في البحر الأحمر يعني بسببه علم مصر بيرفرف عالي على عبارات الموت ...و هو ده الجديد!!!....كمان إحنا بنخلف كتير يعني كل راجل جارر وراه نص دستة عيال ...و عيال كتير يعني إستخدام كتير...و أنتوا عارفين عفانة المصريين في الإستخدام ....يعني الراجل يعمل إيه منكم يا ظلمة ؟؟!!! يشد في شعره ( هو قرعة أصلن ) ...يعني يلاحق صيانة على استخدامكو ده منين ؟هي سويقة من غير بواب ؟؟!! يعني حراام عليكم الراجل دفع أكثر من التعويضات المطلوبة ...و بعدين تنكروا أنكم كنتم عاوزين يكونوا لكم حد في العبارة عشان تأخدوا تعويضات ....فعلاً ناس يندب في عنيها رصاصة و ميملاش عنيهم اللي فقعتها الرصاصة إلا التراب .......بعدين الحكومة حتلاحق على إيه ولا إيه ؟؟كان الله في العون..إحنا آسفين يا باشا والله ما قصدنا نتريق شقاوة شعب يعني بنهرق معاك ...الأمن مستتب ، و كله تمام يا باشا .....أحر التعازي لأهالي الضحايا ( إللي ماتوا قضاء و قدر) ..يا عيني عليكي يا مصر بقيتي قاسية أوي على ولادك،رخص تمنهم أوي ما بقتش تفرق يموتوا جعانين ، يموتوا محروقين ،ـ يموتوا مسجونين أو يموتوا غرقانين مش فارقة ما كله سجن كبييييييييييييير أسمه أستبداد .....الفاتحة على روح المرحومة

بيتي الذي لم أسكنه أبداً ....

2008-07-31T10:03:00.000-07:00

الكل يتغزل بالجبال الخضراء، ينابيع المياه ،الزرع و الأشجار. اللون الأخضر للناس جميعاً رمز الحياة ...لذا فالجمال هو كل أخضر...فيوم تكتسي الأرض بالخضار ، تعلن الأعياد و يحتفل الناس ...فالأخضر هو الحياة و هو الجمال ...فيما يخصني فأنا فتاة الصحراء ...أشعر أن الصحراء مثلي؛ أحيانا تكون هادئة ، ساكنة ووديعة ....فتأخذ كثبانها الرملية تلك التدرجات الجميلة التي تمزج بين الأصفر ، البني و البرتقالي بشكل بديع جميل آخاذ يأسر العقول!!...و حين تثور ثائرتها ، تذر الرمال في وجوه محبيها ....
لعل السبب في تعلقي الشديد بالصحراء هو نشأتي في ذلك البلد الخليجي ...حيث كانت الصحراء تحيط بنا في طريق الذهاب و العودة من المدرسة ...فشعرت منذ الصغر بجمالها وتزوقت روقنها.....كان منزلنا وقتها في منطقة مليئة بالفلل المطلة على البحر ...و أذكر أنني كنت كل صباح أستيقظ فأحيي البحر من نافذة غرفتي .......و حين تنتصف شمس النهار كنت ألمح بعض الخيام المنصوبة ، و التي تكن بالمسافة البعيدة عن منزلنا ....و كنت أحسد سكانها فقد كانوا من ساكني المدن مثلي ....لكنهم كانوا يذهبون هناك كعوائل للإستجمام ...لكنني لم أتمكن حتى الآن من تحقيق هذا الحلم ، لأن أمي ليست من محبي الصحراء و التخييم !! و كنت أنظر في وقت الغروب إلى الشمس و هي تطبع قبلاتها على صفحة الماء، الصحراء و الكون كله.... كم أتمنى أن أحتضن الصحراء بين جوانحي و أن أسمعها نبضات قلبي ......كم أتمنى أن أكون هناك وحدي ....في تلك الصحراء التي تشبهني .....و أن أترك العنان لشمسها لتقبل وجهي الحنطي ....كم أتمنى أن أترك نسيمها االعليل يداعب خصلات شعري ليشعرني بتلك الحرية التي كنت أشعر بها كلما ، قادتني قدمي إلى شاطىء البحر المجاور لبيتنا و الذي كنت أرى من ضفته الصحراء الممتدة من خلفي و البحر المترامي الأطرف من أمامي، فكان ينتابني ذاك الشعور أنني أحتضن العالم كله بيدي ,و أنه لا يوجد على الأرض من هو أسعد مني !!!! فالصحراء بيتي الذي لم أسكنه أبداً....

تسقط الثانوية السامة

2008-07-30T17:49:00.000-07:00

أخييييييرااااااااااااً و بعد طول إنتظار ......أطلق الحكم صافرة الختام في اللقاء المثير و الطويل و الممل في آنٍ واحد ،

*
*
*
*
"الثانوية السامة"

و بهذا انتهى اللقاء بنتيجة 0:0 و معلش ولا تزعلوا!!! أحمدوا ربنا أن المبارة أنتهت هذا العام ( مهذا إنجاز في حد ذاته) بغض النظر عن النتيجة!!و بمناسبة الخاتمة اللي زي الفل لهذا المارثون الطويل الممل المسمى بالثانوية السامة ( أقصد الثانوية العامة) .....نهنىء الناجحون و نقولهم...... ألف مبروك ، ربنا معاكمو يحنن قلب مكتب التنسيق عليكم ....ونتوجه بأحر التعازي لمن لم يحالفهم الحظ و نقولهم: معلش كلنا لها و صدقني مش فرقه يعني كلنا في الهم سوى!!!...و بالصراحة الثانوية السامة دي عاملة زي شارع زحمة كل العربيات وقفة مستنية في ترقب الإشارة الخضراء....التي يعطيها الوزير مع بدء المارثون التاريخي ، لكن للأسف الإشارة حمراء على طول الخط.....و مثل غيري مررت بتجربة التعليم الشاقة ....يعني لا نشاط و لا هوايات و لا أي نشاط غير النشاطات المتعلقة بالدراسة و التعليم و بس ....فأستمررت في الدوران في ساقية التعليم ....حتى أفقت في يومٍ من ذات الأيام على حقيقة : أني لا أفهم شيءٍ عن هذه الحياة أو عن نفسي !!! ربما تعلمت بعض من الكمياء أو التاريخ ....لكنني لم أتعلم عن نفسي أو عن العالم شيئاً ....أيامي في الثانوية السامة كانت متشابهة يعني كل يوم زي اللي قبليه و اللي بعديه!!! يعني من الآخر ملل ربنا يتوب على الناس منه ...الثانوية العامة في بلادنا إحدى وسائل التعذيب و القهر زيها زي السجون و المعتقالات ....الواحد يفضل يطحن فيها لحد ما يتسحق ......و في الختام أحب أقول : تسقط الثانوية السامة....مع تحيات محدثتكم زنوبة
و السلام عليكم و رحمة الله و بركاته

سوبر زنوبة أو زنوبة اللهلوبة

2008-07-29T04:08:00.000-07:00

مرحبا مرة أخرى ...في رحلة البحث عن زنوبة ...و هاهي بعض الجوانب من حياة المدعوة زنوبة ( ومثلما تعلموا جميعاً زي ما قلت سابقاً اللي حيدخل المدونة دي حيتحبس فيها و برضاه أو غصباً عنه سيشاركني البحث عن زنوبة و إلا سنقطع يديه أو يديها بالمنشار لنمنعه من الدخول على الإنترنت مرة أخرى) ....حتى لا أطيل عليكم .....من أبرز الجوانب في حياة المدعوة زينب (الشهيرة بزنوبة) هي ظاهرة أو حقيقة السوبر زنوبة أو زنوبة اللهلوبة ....و متسألونيش يا ترى يا هل ترى ...ما هو سر هذا النشاط و تلك الهمة ؟؟!!
فزنوبة اللهلوبة ...لهلوبة فعلاً كل صباح تنفض الشقة و تطبخ الغذاء ...و تري الحبايب و الأقارب شطارة زنوبة ....فهي ست بيت ممتازة يعني من تقميع (تحضير) البامية و تخريط الملوخية لحد لقمة القاضي (اللي هيه الزلابية أو الجيمت) يعني مفيش كده بنوتة (عروسة يعني ) كاملة من مجاميعهFull options ...المهم زنوبة لما بتروح المصيف مع أقاربها ...تلاقي مامتها (أمها يعني ) بتقولها: قومي أطبخلنا يا زنوبة يا حبيبتي وريهم كلهم الشطارة!!! و أرد أنا : طبعاً طبعاً يا مامتي ...ده أنا زنوبة اللهلوبة و لا فخر !! و أجز على أسناني حينما أتذكر نونة بنت طنط سِكينة ( و هي سكينة فعلاً على رقاب العباد ) و التنافس الحامي ....فقد قامت بتقطيع الخضراوات و هاهي الآن تستعرض مهارتها و تفرد عضالاتها ....لأأأأأأأ لازمن أوريها مهارات زنوبة ....و أقوم بزضع الشريطة الحمراء على رأسي (قال يعني رمز التحدي إما النصر أو الموت).....و أتحول إلى سوبر زنوبة ....قول إزاي...؟؟!! قلت إزاي ؟؟!! يعني زنوبة بشاطرتها و ناشطها المعهود بتدخل عند أي قريب أو حتى غريب و تعرض خدامتها المجانية ....و النبي يا ظنت سنية خليني أغسل الصحون أصل دي هوايتي من زمان,و النبي يا طنت سكينة خليني أطبخلك النهاردة !!! لأ كل ده و بتبقى لابسة الحتة الزفرة يعني من الآخر عروسة بعنى الكلمة (ولا عروسة المولد يعني) أنا واثقة أنك دلوقتي مصدوم ....أيوه معاك حق .....أصل صراحةً مفيش كده يعني .....!!! هو فيه كده؟؟!!!
حقيقةً.....
و بأمانة ...
و لأنك حلفتني بطنط سكينة حبيبة قلبي .....
مفيش حد بيعمل كده بمزاجه يعني إلا الحالات الإستثنائية و الإستثناء لا يوجب التعميم ......
يعني زنوبة من الآخر مطابة من مامتها و طنط سكينة و جارتهم أم فتحي و القريب و الغريب ، الصديق و العدو ....أن تتحول بقدرة واحد أحد إلى سوبر زنوبة ....فيجب أن تكون متفوقة دراسياً و أول حاضري و مهنئي و معزي أي حد في أي حتة ..و لازمن تري الجمبع أنها لهلوبة و تعرض خدامتها لطوب الأرض بداعي و بدون داعي ...و لازمن تبقى متفوقة في الدراسة و تكيد العوازل ,و تجيب عريس لقطة قبل بنت الست أم فتحي جارتهم ...و كل يوم و في كل وقت تبقى قاعدة على سنجة 10 ( و لا كأن التلفزيون جاي يصور) ،, و يجب أن تجمع زنوبة بين البراءة و الجرأة!!! يعني تحمر خجلاً من أي مجاملة رقيقة بس تبقى مبادرة و تأكل العيال الولاد زملائها ............و و و و و و ............يا لهويييييييييييييييييييييييي !!! ميت ألف حاجة .....فتحولت زنوبة من زنوبة اللهلوبة إلى زنوب المهبولة أو زنوبة المجنوبة ...و قريباً جداً إنشاء الله ......في الشريط السفلي لقناة الجزيرة حتلاقوا مكتوب: الحرية و الرحمة لزنوبة (زينب سابقاً) السجينة في معتقل المجتمع سيء السمعة ......و حتنزل المظاهرات تجوب عواصم العالم المختلفة تطالب بالرحمة لزنوبة !!! يا ريت بس ماحدش حيعبر زنوبة .....حتى لا أطيل عليكم و أنا عارفة أنتوا مش ناقصين صداع !!! أبحثوا معي عن زنوبة .....و اللي عندوا أي معلومات يا ريت يرسلها قد تفيد في رحلة البحث عن زنوبة ...........و إلى اللقاء حتى موعد الرحلة القادمة للبحث عن زنوبة
ملحوظة : الcomments هنا إجبارية يعني مش بمزاجِك أو مزاجَك ...يعني لازمن تترك تعليق.....

الشكوى لغير الله مذلة

2008-07-28T18:40:00.000-07:00

إلى كل الأخوة و الأخوات ، الأحياء منهم و الأموات من كل المستويات و الطبقات فسواء كنت وزير أو سفير أوحتى غفير (حارس يعني ) فأنت مجبور على عدم مغادرة هذه المدونة ( و ده طبعاً مش بمزاجك قولي : ليه ؟!! قلت : ليه !! عشان أنا لا أؤمن بالديمقراطية ...الحكم الرشيد هو حكم الرجل الواحد ...و في هذه المدونة أنا الحاكم بأمر أقصد الحاكمة بأمر الله زنوبة (زينب سابقاً) و بناء على قرارت وزراء الإعدام العرب (الإعلام سابقاً) أنت مجبور أن تبحث معي عن ذنوبة شئت هذا أم أبيت !!! و ده لأنك لو لم تنفذ الأوامر حجبلك خبراء التعذيب من وزارة الداخلية يربوك و يعرفوك مقامك!!! ندخل في المفيد مين زنوبة ؟!! زنوبة دي بنوتة عندها 18 سنة و أسمها الحقيقي زينب ....الأسم الثلاثي : غير معلوم ، الطول : غير معلوم ، الشكل : غير معلوم ، الجنسية : غير معلومة لأ لأ هية عربية !!
و لازمن تجيب زنوبة من تحت الأرض و إلا سنرسلك إلى محاكمة عسكرية !!!
متخفش أوي كده ....أنا بضحك معاك !! أنا زنوبة (زينب سابقاً) عندي 18 سنة ، أما السبب اللي خلاني أكتب عن نفسي هو أني حاسة أني أبتدأت ألسع (يعني أجن باللهجة المصرية) يعني أصبحت أعيش في أحلام اليقظة ....في كل مكان و أي مكان حتى لو في المحاضرة أو في المترو ....و قريباً الناس حتقول يا عيني عليكي يا بت يا زنوبة كنت بنت ناس !! وده ليه لأني مش لاقية ناس عاقلة أناقشهم مشاكلي (الدنيا مليئة بالعقلاء لكني لا أعرف أي منهم و هذا لأن العقلاء لن يتعرفوا على المجانيين أمثالي ) ....و أوعوا تفتكروني بشتكي الشكوى لغير الله مذلة .....بعدين اللي معندوش أهل أو أخوات يبقى شباب و بنات الإنترنت إخواته و أهل المدونات و البلوجز أهله ....لكن أنا عاوزة أأخذ رأيكم ....فبليييز و النبي قولوا أعمل إيه عشان زنوبة ترجع ؟؟!!